"Müsavat faktiki olaraq iki yerə parçalanıb"
Səxavət Əlisoy: “Baş verənlər “Müsavat”ın iki hissəyə parçalanmasını göstərən əyani faktordur”
“Müsavat” partiyasına yeni başqan təyin edilməsi ilə söz-söhbətlərin baş qaldırması bir oldu. Qurultayın yekunlaşmasına baxmayaraq təyin olunmuş yeni başqan və partiyadaxili gedən proseslər haqqında danışılanlar bitmək bilmir.
Ölke.Az-a danışan Müsavat Partiyasının VIII qurultayında başqanlığa keçmiş namizəd Səxavət Əlisoy bildirdi ki, hər şey ayın 6-ı saat 15:00-da Müsavat Partiyasının mərkəzi qərargahında baş verən görüşdən sonra bəlli olacaq.
“Baş verənlər “Müsavat”ın iki hissəyə parçalanmasını göstərən əyani faktordur. Bütün prosesləri mətbuatdan izləyirik görürük. Mövqelər qoyulur ortaya və biz sonunu gözləyirik ki, görək, hara gedib çıxacaq?
Qubad İbadoğlu tərəfdarlarına görüş vaxtı təyin edib. Biz özümüz də rəyimizi bildirmişik. Müsavat Partiyasının təməl prinsiplərindən biri də ləyaqətdir. Ləyaqətsizlərin baş verənlər haqqında danışmasına gərək yoxdur”.
Tərəfdarları ilə görüşdə siz də iştirak edəcəksiniz?
“Xeyr, mən iştirak etməyəcəm. Ancaq onlar özləri hansı addımlar atmaq lazım olduğunu həmin görüşdə müzakirə edəcəklər”.
Xatırladaq ki, Qubad İbadoğlu Müsavat Partiyasının başqanlıq yarışında rəqibi Arif Hacılıya 28 səs fərqiylə məğlub olub.
Fatimə İbrahimova
Ölkə.Az
