Tural Abbaslı: "Niyə biz 21 ildir müxalifətdəyik?"
"Müsavat" partiyasının təşkil etdiyi mitinqdən iki gün keçsə də, bu mitinqin müzakirəsi hələ də davam edir. Sosial şəbəkədə gedən müzakirələrdə bir qrup şəxs mitinqdə iştirakçıların az olmasını iddia edir.
"Müsavat" partiyasının məclis üzvü Tural Abbaslı Ölkə.az-a mitinqin kütləvi olmamasının səbəblərinə və digər partiyaların qatılmamasına aydınlıq gətirib.
Tural Abbaslı: "Normal demokratik ölkələrdə mitinqin önəmi onun kütləviliyindən daha çox qaldırdığı məsələ ilə ölçülür. Bu gün siyasi məhbuslar və insan haqları Azərbaycanda önəmli məsələdir. Ona görə də, bu məsələni bir daha diqqətə gətirdiyinə görə, bu mitinqi uğurlu saymaq olar.
Havaların soyuq olması bir yana, insanların da siyasi proseslərdə aktivliyi xeyli aşağı düşüb. Baxmayaraq ki, bələdiyyə seçkilərinə sayılı günlər qalıb, amma ölkədə siyasi aktivlik demək olar ki, yox dərəcəsindədir. Ona görə də, mitinqdə iştirak edənlərin bu qədər olacağını öncədən təxmin etmək olardı.
Onu da nəzərə almaq lazımdır ki, bir müddət öncə qurultayımız qurtarıb, ancaq daxildə də narazılıqlar var. Belə bir vəziyyətdə partiyanın mitinq təşkil etməsi çox həssas məsələ idi və təqribi iştirak belə də gözlənilirdi".
Məclis üzvü açıqlamasında siyasi məhbuslar məsələsinə da toxunub.
"Siyasi məhbuslar tək "Müsavat" partiyasının problemi deyil. Sivil ölkələrdə siyasi partiyalar mitinqlərin ancaq və ancaq təşkilatçılığını edir. Kütləviliyin təmin olunması isə xalqın iştirakından aslıdır.
Xalq cəbhəsi və digər partiyalara bu mitinqdə heç nə iştirak etməmək hüququ vermirdi. Kifayət qədər Cəbhəçilər həbsdədir. Əli Kərimlinin müşavirləri də həbsdədir. Müsavatın təşkil etdiyi mitinqdə onların da portretləri qaldırıldı.
Cəmiyyət, beynəlxalq təşkilatlar baxmır o mitinqi kim təşkil edib. Onlar hamısı bunu müxaliftətin mitinqi kimi qəbul edir. Çalışmaq lazımdır ki, müxalifət adına keçirilən mitinqlər gözəl, kütləvi olsun və daha çox səs gətirsin.
Düzdür, cəbhəçilərin hüququdur, partiyanın qərarıdır ancaq buna haqq qazandırmıram.
- Milli Şura və yaxud AXCP mitinq təşkil edəndə iştirak edəcəksiz?
- "Əlbəttdə iştirak edəcəyik. Kiminsə səhv addım atması o demək deyil ki, biz də səhv addım atmalıyıq. Bizim əsas rəqibimiz hakimiyyətdir. Demokratiya, xalqımız qazanacaqsa təbii ki, iştirak edəcəyik. Sizin vasitənizlə səslənirəm ki, lazımsız intiriqaları kənara qoymaq lazımdır. Bəzən partiyaların siyasi münasibətləri şəxslərin siyasi münasibətlərindən aslı vəziyyətə düşür. Ancaq hakimiyyət soruşmur ki, cəbhəçisən, müsavatçısan gəlib həbs edir. Artıq şəxsi intiliqaları, ambisiyaları kənara qoymaq vaxtıdır. Oturub araşdırmaq lazımdır ki, niyə biz 21 ildir müxalifətdəyik. Əvvəlki metodlardan imtina etmək lazımdır ki, daha 21 il də müxalifətdə qalmayaq.
Səxavət Məmməd
Ölkə.az
