Elmar Məmmədyarov AŞPA-da sərt danışdı

Azərbaycanın xarici işlər naziri Elmar Məmmədyarov Strasburqda AŞPA-nın payız sessiyasında çıxış edib

Ölkə.Az-ın məlumatınba görə, nazirin çıxışı Azərbaycanın Avropa Şurasının Nazirlər Komitəsinə sədrliyi ilə bağlıdır. O, çıxışına Ukraynadakı böhrandan başlayıb və deyib ki, Nazirlər Komitəsi sentyabrın 5-də imzalanan atəşkəs sazişini alqışlayır.

Nazir ölkədə korrupsiya ilə mübarizədə aparılan işlərdən danışıb, bu mübarizənin ölkə üçün prioritet olduğunu vurğulayıb.

E.Məmmədyarov Nazirlər Komitəsinə sədrlik çərçivəsində sentyabrda keçirilən dini tolerantlıq konfransını xatırladıb, Azərbaycanın dini tolerantlıq göstəricilərinə görə öndə gedən olduğunu bildirib.

O, 4-cü Beynəlxalq Humanitar Forumundan danışıb, bu mötəbər tədbirə dünyanın bir çox ölkələrindən alimlərin, dövlət xadimlərinin qatıldığını söyləyib.

E.Məmmədyarov ölkədə fundamental azadlıqların qorunmasından danışıb: "Sizi əmin edirəm ki, gələn ay sədrliyimiz başa çatandan sonra əməkdaşlığı davam etdirəcəyik. İnternetə hər hansı qadağa, sui-istifadə halları yoxdur.»

Sonra nazir suallara cavab verib.

Azərbaycanın XİN rəhbəri İspaniyadan olan deputat Pedro Agramuntun "İyulda Dağlıq Qarabağda nə baş verib, Rusiyanın həmin əraziyə əsgər göndəribmi" sualına Dağlıq Qarabağ münaqişəsinin tarixindən danışaraq cavab verib: "Bildiyimiz odur ki, Ermənistan qüvvələri geri çəkilməlidir. Davamlı inkişaf barədə danışırıqsa, işğal, bir ölkənin digərini ərazisini işğal etməsi baş verməməlidir. Qaçqınlar öz vətənlərinə qayıtmalıdırlar."

Deputatlardan biri siyasi məhbuslarla bağlı sual verib: "Amnesty International" Azərbaycanda 20-dən çox vicdan məhbusunun olduğunu deyir. Siz də prezidentinizin yay sessiyasında dediyi kimi düşünürsünüz ki, Azərbaycanda siyasi məhbus yoxdur."

E.Məmmədyarovun bu suala cavabı lakonik olub: "Siz elə cavabı da verdiniz. AŞPA siyasi məhbus anlayışının tərifini verib, həmin tərifə görə, Azərbaycanda siyasi məhbus yoxdur. Başqa cavab hipotetik olardı. Təşəkkür edirəm."

Ölkə.Az