Poroşenko şirkətinə müştəri tapa bilmir

Pyotr Poroşenko sahib olduğu "Roshen" şirkətini hələ də sata bilməyib.

Ölkə.Az Almaniyanın N-tv telekanalının yaydığı məlumata əsasən xəbər verir ki, Pyotr Poroşenko seçkiöncəsi verdiyi ən əsas vədlərindən birini hələ də yerinə yetirməyib. Söhbət prezidentin şirniyyat biznesi olan və dünyaca məşhur "Roshen" şirkətindən gedir.

Almaniyanın kanalı bildirir ki, Ukrayna prezidentinə məxsus şirkət üçün hələ də uyğun müştəri tapılmayıb və gözləniləndən də çətin işə çevrilib.

Xarici investorlar üçün Ukrayna hal-hazırda cəlbedici deyil və "Roshen" şirkəti satışlarının beşdə birinin düşdüyü rus bazarındakı mövqelərini itirdikdən sonra daha çox problemlərlə üzləşib.

N-tv qeyd edir ki, avropa və amerikalı investorlar üçün bu siyasi minalanmış sahədən uzaq durmaq üçün xeyli səbəblər vardır.

Xatırladaq ki, Poroşenko 1996-cı ildə əsasını qoyduğu "Roshen" şirkətini satacağı barədə fikri Almaniyanın "Bild" nəşrinə verdiyi müsahibədə səsləndirib. O bildirib ki, bütün biznesini satmağa hazırdır. 

Rəşid Mustafazadə

Ölkə.Az