“Heç bir fermam yoxdur”

H.Hacıyev “Ölkə.Az”a açıqlamasında deyib ki, “Qaraqaşlı-Broyler” Açıq Səhmdar Cəmiyyətinin (ASC) icraçı direktoru Heydər Əsgərovun onun haqqında səsləndirdiyi fikirlər tamamilə yalandır:

“Məndə olan səhih məlumatlara görə, “Qaraqaşlı-Broyler” ASC-nin baş səhmdarı Müşfiq Hüseynovun qaynatası Əli Kərimlinin mühafizə rəisidir. Həmin Müşfiq Hüseynov bu gün Əli Kərimlini maliyələşdirən əsas adamdır. Onlar iddia edirlər ki, guya Əli Kərimli ilə əlaqələrinə son veriblər. Ancaq bütün bunlar diqqətdən yayınmaq üçündür. Artıq prokurorluq tərəfindən yoxlamalara başlanılıb. Mən çağırış edirəm ki, hüquq mühafizə orqanları, Kənd Təsərrüfatı və İqtisadiyyat nazirlikləri, Dövlət Gömrük Komitəsi onun zavodunda yoxlamalar aparsın. Görəcək ki, yumurtanın qiymətini neçəyə verir və buna səbəb nədir. Ermənilər Əli Kərimliyə pulu məhz bu şirkət tərəfindən ötürür”.

H.Hacıyev özünün heç bir biznesə malik olmadığını söyləyib:

“Azərbaycan xalqı gəlib məni yoxlaya bilər. Mənim heç bir biznesim, fermam yoxdur. Əgər fermam varsa, onu da Müşfiq Hüseynova bağışlamağa hazıram. Aparıb onu da ermənilərlə bir yerdə işlədər”.

Xatırladaq ki, “Qaraqaşlı-Broyler” Açıq Səhmdar Cəmiyyətinin (ASC) icraçı direktoru Heydər Əsgərov “Ölkə.Az”a açıqlamasında Müasir Müsavat Partiyasının sədri, prezidentliyə namizəd Hafiz Hacıyevin toyuq fermasının olduğunu iddia edərək, bu səbəbdən çalışdığı şirkətin hədəfə gəldiyini söyləyib.

Vasif Həsənli
Ölkə.Az