İlham İsmayılov: “Bölgələrdə yaşayan insanlar seçkidə yüksək fəallıq nümayiş etdirəcəklər”

Bu fikirləri “Ölkə.Az”a açıqlamasında Mətbuat Şurasının İdarə Heyətinin üzvü, Azərbaycanlıların və digər Türkdilli Xalqların Əməkdaşlıq Mərkəzinin (ATXƏM) sədri, Dünya Azərbaycanlıları Əlaqələndirmə Şurasının və Avropa Azərbaycanlıları Konqresi Məşvərət Şurasının üzvü İlham İsmayılov bildirib. 

İlham İsmayılov deyib ki, Azərbaycan xalqı dahi siyasətçi, Ulu Öndər Heydər Əliyev tərəfindən əsası qoyulan müstəqil dövlətimizin inkişafına töhfəsini vermək üçün bu vacib siyasi aksiyada fəal iştirak edir. 

Onun sözlərinə görə, Azərbaycan xalqı 11 apreldə də bir daha öz iradəsini nümayiş etdirəcək.

“Müşahidələrimə əsaslanıb əminliklə deyə bilərəm ki, bölgələrimizdə yaşayan insanlar seçkidə yüksək fəallıq nümayiş etdirəcəklər. Azərbaycan dövlətinin və xalqının bundan əvvəlki seçkilərdə əldə etdiyi zəngin təcrübə də belə deməyə əsas verir. Bu gün regionlarda, ən ucqar bölgələrimizdə də informasiya-kommunikasiya sistemi yüksək səviyyədə qurulub. Qarşıya qoyulan ən vacib məsələ ölkənin hər yerində seçkilərin şəffaf keçirilməsi, tələb edilən qaydalara ciddi əməl edilməsi və heç bir qanun pozuntusuna yol verilməməsidir. Ona görə də, dövlətin böyük diqqət və qayğısı ilə müasir informasiya-kommunikasiya texnologiyalarından geniş istifadə olunması seçki prosesini əvvəldən axıradək izləməyə, geniş və hərtərəfli müşahidə aparmağa, seçki prosesində aşkarlığın təmin edilməsinə şərait yaradır”.

Vasif Həsənli
Ölkə.Az