“İşə qəbul edilən şəxslərin maaşlarının yarısını dövlət ödəyəcək”

“Ölkə.Az” xəbər verir ki, bu sözləri əmək və əhalinin sosial müdafiəsi nazirinin müavini  İdris İsayev Milli Məclisdə müzakirəyə təqdim edilən "Məşğulluq haqqında" qanununun layihəsinə münasibət bildirərkən deyib.

Nazir müavini bildirib ki, məşğulluq dövlətin sosial siyasətinin prioritet sahəsidir: 
“Cənab Prezidentin bütün iclaslarında işsizliq məsələrinə toxunub. Bu qanun layihəsi də məşğulluq məsələsindəki problemlərin həllinə yönəlib”.

Nazir müavini onu da vurğulayıb ki, bu qanun layihəsi yeni iş yerlərinin yaradılması, aktiv əmək bazarının tənzimlənməsinə xidmət edir:
“Bu qanunda kifayət qədər innovativ yanaşmalar var. Elektron resurslar əsasında vakansiya bankının yaradılması, işsizlərin yenidən əmək bazarına qaytarılması vacib məsələdir. Bu qanun qəbul edilənən sonra dövlət  işaxtaranı iş yerinə göndərəcəksə, bu zaman həmin şəxsin əmək haqqının yarısını dövlət qarşılayacaq. Əlbəttə, bununla bağlı bəzi şərtlər də var. Belə ki, bu halda işəgötürən işçi ilə iki ildən az müddətdə əmək müqaviləsi bağlamamalıdır. Nəticədə işçinin bir illik əmək haqqı dövlət, bir ili isə işəgötürən tərəfindən ödənilmiş olacaq. Bu qanun qəbul ediləcəksə, praktik baxımdan iş axtaranların problemlərini həll etmək imkanımız olacaq”.

Əmək və sosial siyasət komitəsinin sədri Hadı Rəcəbli isə yeni qanun layihəsini belə şərh edib:
“5 fəsil, 34 maddədən ibarət layihə məşğulluğa kömək sahəsində dövlət siyasətinin hüquqi, iqtisadi və təşkilati əsaslarını, eləcə də işaxtaran və işsiz şəxslərin sosial müdafiəsi sahəsində dövlət təminatlarını müəyyən edir. Layihədə “işsiz”  və “işaxtaran” şəxslər anlayışları dəqiqləşdirilib və yeni yanaşma əsasında hər iki kateqoriyadan olan şəxslərin statusları dəqiq müəyyən olunub. Belə ki, işsiz şəxs - işi və qazancı olmayan, işə başlamağa hazır olub, müvafiq icra hakimiyyəti orqanında işsiz kimi qeydiyyata alınan, əmək qabiliyyətli yaşda olan əmək qabiliyyətli şəxs, işaxtaran isə müvafiq icra hakimiyyəti orqanına münasib iş üçün müraciət edən və işaxtaran kimi qeydiyyata alınan şəxs hesab edilib. Qüvvədə olan qanuna görə, işsiz statusu almayan şəxs işsiz şəxs deyil, işaxtaran hesab edilir”.

Daha sonra qanun layihəsi birinci oxunuşda qəbul edilib.
 
Vasif Həsənli
Ölkə.Az