"Jirinovski Azərbaycan haqqındakı fikirlərini dəyişməsəydi onun nəinki qulağını, başqa..."

Yayılan məlumatlara görə, Rusiya Liberal-demokrat partiyasının sədri, Dövlət Dumasının sədr müavini Vladimir Jirinovski Azərbaycana gəlir. Onun Azərbaycan haqqında səsləndirdiyi fikirlər və təhqiramiz ifadələr ölkəmizdə böyük ictimai narazılığa səbəb olmuşdu. Buna görə Jirinovskinin "qulağını kəsəcəyi" ilə hədələyən Müasir Müsavat partiyasının sədri onun Azərbaycana səfərini Ölkə.az-a şərh edib.

Hafiz Hacıyev: "Mən Jirinoviskidə günah görmürəm. Azərbaycana zərər vermək istəyən qüvvələr var. Jirinovski heç nə bilmirdi, ona hansı məlumatı verirdilər o da elə danışırdı. Bu hadisələrdən sonra mən öz müşavirimi göndərdim Rusiyaya. Müşavirim orada Jirnovskini məlumatlandırdı, Azərbaycan haqqında düzgün məlumatları ona çatdırdı. Bilirsiniz,  Jirnoviski öz vətənini, xalqını sevən bir insandır. Onu düzgün məlumatlandırmaq lazımdır. İndi Jirnoviski Azərbaycan və onun xalqı haqqında dediklərinin peşmançılığını çəkir. Ona başa salandan sonra ki, Azərbaycanda rus dilli orta məktəblər var, burda çoxlu sayda ruslar yaşayır və azərbaycanlılardan da pis yaşamırlar o, fikrini dəyişdi ölkəmizin xeyrinə bəyanatlar verməyə başladı. Azərbaycanın tolerant, demokratik ölkə olmasını ona başa salandan sonra Jirnoviski ağıllandı. Jirnoviskinin Azərbaycana gəlməsi sevinirici bir haldır. O nə qədər bizim düşmənimiz də olsa onunla dialoqa getməliyik. Biz ona başa salandan sonra ki, dədən-baban türkdü, türkdən əmələ gəlmisən xeyli dəyişdi. O bilir ki, türklərlə mübarizə ona xeyir gətirməcək. Əgər baş tutsa, biz Jirinovski ilə görüşəcəyik və ona başa salacağıq ki, sən həmişə Azərbaycanın düşəməni yox dostu olaraq qal. Məndə olan məlumatlara görə o, Azərbaycandakı inkişafı öz gözü ilə görməyə gəlir. Mən demişdim ki, Jirnoviskinin qulağın kəsəcəm və sözümün üstündə də dururam. Əgər Jirnoviski Azərbaycan haqqındakı fikirlərini dəyişməsəydi onun nəinki qulağını, başını da kəsəcəydim. İndi bir dəlini ağıllandırmışam. Gəlir Azərbaycana görək nə deyəcək. Gəlin bir az səbr edək".

Əli İsayev

Ölkə.az