Qarabağda sülh olacaqmı?
ABŞ dövlət katibi Con Kerri prezident İlham Əliyev və Ermənistan prezidenti Serj Sarkisyanla görüşündə qoşunlarının təmas xəttində artan gərginliklə bağlı dərin narahatlığını ifadə edib.
Dövlət Departamentinin açıqlamasına görə, Birləşmiş Ştatlar hesab edir ki, döyüşlərin dayandırılması və Ermənistanla-Azərbaycan arasında əlaqələrin normallaşması iki ölkənin xalqlarına sülh və əmin-amanlıq gətirəcək, Cənubi Qafqaz regionunda stabilliyi təmin edəcək. Kerri tərəfləri atəşkəs rejiminin şərtlərinə hörmət etməyə, Azərbaycan və Ermənistan cəmiyyətinin sülhə hazırlaşdırılması üçün əlavə tədbirlər görməyə, münaqişənin həlli üçün ATƏT-in Minsk qrupu həmsədrlərilə aparılan işi davam etdirməyə çağırıb.
NATO sammiti çərçivəsində Dağlıq Qarabağ münaqişəsinin nizamlanması yolları prezident İlham Əliyevin Fransa prezidenti Fransua Ollandla görüşündə də əsas müzakirə mövzusu olub. Dövlət başçıları Ermənistan-Azərbaycan, Dağlıq Qarabağ münaqişəsinin həlli ətrafında geniş fikir mübadiləsi aparıblar.
Fransua Olandın Ermənistan prezidenti Serj Sarkisyanla görüşündə də Dağlıq Qarabağ münaqişəsinə toxunulub. Yaxın vaxtlarda Fransua Ollandın təşəbbüsü ilə Fransa, Azərbaycan və Ermənistan prezdentlərinin üç tərəfli görüşü gözlənilir.
Prezident İlham Əliyev NATO sammitində çıxışında da Ermənistan-Azərbaycan Dağlıq Qarabağ probleminə toxunaraq, münaqişənin yalnız Azərbaycanın ərazi bütövlüyü çərçivəsində həllinin vacibliyini diqqətə çatdırıb.
Dövlət televiziyasının məlumatına görə, İlham Əliyev deyib ki, Azərbaycan NATO tərəfdaşlığı çərçivəsində regional təhlükəsizlik və sabitlikdə mühüm rol oynayır. Bununla belə, bu gün regionumuzdakı təhlükəsizliyə ən böyük hədə Azərbaycan ərazisinin iyirmi faizini təşkil edən Dağlıq Qarabağ və ətraf yeddi rayonu işğal altında saxlayan Ermənistanın işğalçılıq siyasətidir. Ermənistan azərbaycanlılara qarşı etnik təmizləmə siyasəti həyata keçirib və bunun nəticəsində bir milyondan artıq insan qaçqın və məcburi köçkün vəziyyətinə düşüb. BMT Təhlükəsizlik Şurasının dörd qətnaməsi Ermənistan qoşunlarının işğal edilmiş ərazilərdən dərhal və qeyd-şərtsiz çıxarılmasını tələb edir. Əfsuslar olsun ki, Ermənistan onlara məhəl qoymamaqda davam edir və münaqişə həll olunmamış qalır. Münaqişə beynəlxalq hüquq normaları və Azərbaycanın ərazi bütövlüyü əsasında həll edilməlidir.
Dövlət başçısı deyib ki, NATO-nun bu məsələ ilə bağlı mövqeyini və əvvəlki sammitlərdə Azərbaycanın ərazi bütövlüyü və suverenliyinə verdiyi tam dəstəyi yüksək dəyərləndiririk.
"İnanırıq ki, NATO-nun beynəlxalq hüququn bu cür mühüm hissəsinə sadiqliyi bundan sonra da davam edəcək. Bununla, o, ədaləti bərpa etməyə və beynəlxalq səviyyədə tanınmış sərhədləri güc hesabına dəyişmək kimi səhv düşüncədən yayındırmağa birmənalı şəkildə yardım edir", - deyə prezident İlham Əliyev vurğulayıb. (ANS TV)
Ölkə.Az
