Politoloq: "Əgər Rusiya bu qurumdan çıxarılsaydı, Putinin nüfuzuna ciddi zərbə dəyə bilərdi"

"Rusiya Avropa Şurasından çıxarılmaq çağırışına qarşı cəld tərpənərək özü nümayəndə heyətinin fəaliyyətini dayandırdı"

Rusiyanın Avropa Şurasının Parlament Assembleyasında səsvermə hüququnun bərpa edilmədiyinə və ona qarşı yeni sanksiyalar tədbiq edildiyinə görə, hökumət bu qurumda fəaliyyətini dayandırıb.

Bu hadisə Rusiya, eləcə də dünyada maraqla qarşılanıb.

Dünyanın diqqətini çəkən məsələ baradə Ölkə.az-a politoloq Razi Nurullayev danışıb.

"Rusiya Avropa Şurasından çıxarılmaq çağırışı ilə üz-üzədir. Əgər Rusiya bu qurumdan çıxarılsaydı, Putinin nüfuzuna zərbə dəyə bilərdi. O, cəld tərpənərək Rusiyanın nümayəndə heyətinin fəaliyyətini dayandırdı. Rusiya buradan çıxarılsa, o zaman Putin sarkazmla deyəcək ki, biz zatən oradan çıxmışdıq. İkinci hədəf isə, bu təhlükəni sovuşdurmaq və məqamında yenidən fəaliyyəti bərpa etməkdir.

Əslində, Rusiyanın Avropa Şurasından çıxarılması bəlkə də dəstək qazana bilməzdi. Mən də, açığı bunun əleyhinəyəm. Çünki, danışıqlar pəncərəsi bağlanır. Buna o zaman isti yanaşmaq olar ki, Avropa Birliyi Rusiyaya qarşı mövqeyini tam sərtləşdirir və heç bir güzəşt yeri qoymur. Yəni, ən azından özü üçün bir yol seçir: Rusiya Ukrayanadan çıxmayınca və Krımı qaytarmayınca, heç bir əməkdaşlıqdan söhbət gedə bilməz və zaman-zaman sanksiyalar daha da ağırlaşdırılacaq. Bu o anlama gəlməlidir ki, Avropa Birliyi və ABŞ Rusiyaya hərbi müharibə yox, iqtisadi və siyasi müharibə elan etməlidir. Əgər onlar "biz Rusiyaya qarşı iqtisadi və siyasi müharibə elan edirik" terminini istifadə etsələr, məncə bir çox şübhələr aradan qalxar və dünya düzəni silkələnib qütblərdəki yerini tutar. Amma, "gizlənpaç" oynamaqla iş olmaz".

Qeyd edək ki, 2014-cü ilin mart ayından etibarən Rusiyanın Krımı birləşdirməsindən sonra rəsmi Moskvanın AŞPA-da səsvermə haqqı əlindən alınmışdı. Həmin qanun bu ilin yanvar ayına qədər qüvvədə idi. Məlumatlara görə, həmin müddətin artılacağı gözlənilirdi.

Fatimə İbrahimova
Ölkə.az