"Türkün 5 düşməni var, onlardan biri də Ərdoğan kimi türkün özüdür"

Bu gün Ərdoğanın andiçmə mərasiminə Ermənistan prezidenti Serj Sarkisyanın rəsmən dəvət aldığı xəbəri ildırım sürəti ilə media məkanına yayıldı. Məsələyə aydınıq gətirmək məqsədi ilə Böyük Quruluş Partiyasının sədri, millət vəkili Fazil Mustafanın və "Bozqurd" partiyasının lideri İskəndər Həmidovdan hadisəyə münasibər bildirmələrni xahiş etdik.

Fazil Mustafa: Ermənistanla münasibətlərini qaydaya salmaq üçün Türkiyədə belə bir tendensiya var. Bu təkcə Ərdoğanın istəyi və təşəbbüsü deyil. Hətta prezident Abdullah Gül də İrəvanda Sərkisyanla futbol matçını izləyərək Ermənistanla münasibətləri yaxşılaşdırma istiqamətində bəzi səmərəsiz addımlar atdı. Ermənistan prezidentinin Ərdoğanın andiçmə mərasiminə dəvəti səmərəsiz addımlardan biridir. Düzdür bu Türkiyə hökümətinin öz qərarıdır, biz ona qarışa bilmərik. Amma bütövlükdə Türkiyənin Ermənistanla münasibətdə bu cür addım atması effektli deyil. Çünki Türkiyə Ermənistana təzyiq vastəsi ilə nələrisə qəbul elətdirə bilər. Ermənistan mədəni üslubla və etik yollarla nəyisə anlayacaq, qavrayacaq bir dövlət deyil. Türkiyə - Ermənistan sərhəddinin açılması isə inandırıcı deyil. Ona görə ki, bu məsələ Türkiyə ilə Ermənistan arasında yox Türkiyə ilə Rusiya arasında müzakirə olunacaq məsələdir. Rusiya belə bir addımın atılmasında maraqlı deyil.

İsgəndər Həmidov: Ermənistan prezidentinin Türkiyə prezidenti Ərdoğanın andiçməsinə dəvət edilməsi məsələsinə çox pis baxıram. Bu yalnış bir addımdır. Bu türklüyə yaraşan bir hal deyil. Türkün 5 düşməni var, erməni, rus, yunan, fransız və birdə Ərdoğan kimi türkün özü. Azərbaycanla Türkiyənin münasibtində heç bir dəyişiklik olmayacaq. Regionda Türkiyə söz sahibi olan dövlətdir. Ancaq Türkiyənin qaz, neft asılılığı Azərbaycandandır. Azərbaycan hakimiyyəti özündə cəsarət tapsa, Türkiyəyə neft və qaz müqavilələrinə təzədən baxmağı bildirməlidir. Bunu bilirəm ki, Azərbaycan hakimiyyəti bunu etməyəcək. Ancaq bu hökmən olmalıdır. Bizim ən böyük silahımız neft və qazdır. Əgər Qarabağın azadlığı uğrunda o neft və qazdan etmiyəcəyiksə, onlar bizim nəyimizə lazımdır?

Ölkə.az