Ekspert: \"Ceyms Uorlikin növbəti “narahatlığının” arxasında başqa məsələ durur\"
"20 il ərzində Ermənistan-Azərbaycan münaqişəsində bir addım da irəli gedilməməsinin əsas günahkarlarından biri də Minsk qrupu, onun həmsədrləri, onların təmsil etdiyi dövlətlərin ermənipərəst və Ermənistanpərəst mövqeyidir".
Bir neçə gün bundan öncə ATƏT-in Minsk qrupunun həmsədrləri son həftələrdə Dağlıq Qarabağ regionunda baş verən gərginlikdən narahat olduqlarını, tərəflərlə, o cümlədən prezidentlərlə danışıqlar aparmağı planlaşdırırdığını bildirmişdi.
Ölkə.az-a danışan Azərbaycan Qaçqınlar Cəmiyyətinin sədri, fəlsəfə doktoru Əziz Ələkbərlinin fikrincə, Ceyms Uorlikin bu çıxışı ikibaşlılıqdan başqa bir şey deyil.
"Ceyms Uorlikin növbəti “narahatlığı”, əslində, təmas xəttində gərginliyin artması ilə əlaqədar deyil, son zamanlar Ermənistan-Azərbaycan sərhədində ermənilərin törətdikləri təxribatların baş tutmaması və nəticədə ermənilərin özünün ciddi itkilər verməsi ilə bağlıdır. Atəşkəsin mövcud olduğu 20 il ərzində Ermənistan-Azərbaycan münaqişəsində bir addım da irəli gedilməməsinin əsas günahkarlarından biri də Minsk qrupu, onun həmsədrləri, onların təmsil etdiyi dövlətlərin ermənipərəst və Ermənistanpərəst mövqeyidir. Amerikalı həmsədr “Ermənistan-Azərbaycan sərhədində baş vermiş zorakılıq hallarından” danışır və bununla bağlı “ciddi narahatlıq” keçirir. Görürsünüz necə ikibaşlı danışır, əslində o, “zorakılıq” deyəndə işğalçı Ermənistanın təmas xəttində təxribat törətməsini yox, Azərbaycanın bu təxribata layiqli cavab verməsini nəzərdə tutur.
Bu günlərdə ABŞ dövlət katibinin Cənubi Qafqaz üzrə sabiq köməkçisi, Birləşmiş Ştatların Azərbaycandakı keçmiş səfiri Metyu Brayza da etiraf etdi ki, “ABŞ ikili standartlar siyasəti yürüdür”. Ceyms Uorlikin: “Biz tez bir zamanda regiona səfər etməyi, tərəflərlə, o cümlədən prezidentlərlə danışıqlar aparmağı planlaşdırırıq” – deməsi də bu ikili standartın saxlanmasını təmin etmək məqsədi güdür. Min dəfə gəliblər, buyursunlar min birinci dəfə də gəlsinlər. Sadəcə, bu gəliş-gedişləri hər dəfə ciddiyə almaq lazım deyil.
“Ərəb baharları”nın acı təcrübəsi sübut edir ki, ABŞ Qarbağ kimi regional münaqişələrin həllində yox, siyasi hakimiyyətlərin dəyişilməsində maraqlıdır. Bu dəyişiklik isə mütləq həmin ölkələrə ölüm, qırğın, aclıq, fəlakət gətirməklə müşayiət olunur. Bu isə onu törədənlərdən başqa heç kəsə lazım deyil. Belə hesab edirəm ki, Azərbaycanın hazırkı xarici siyasi kursu çox uğurludur, xüsusilə Rusiya-Ermənistan münasibətlərinin indiki mərhələsində Azərbaycan çevik siyasi manevrlər edə və Rusiya ilə münasibətlərdə “yaxın qonşu” prinsipi ilə müəyyən korrektələr edə bilər".
Qeyd edək ki, son vaxtlar qoşunların təmas xəttində və Ermənistan-Azərbaycan sərhədində baş vermiş zorakılıq hallarından ciddi narahatlıq keçirdiklərini qeyd edən diplomat tez bir zamanda regiona səfər etmək, tərəflərlə, o cümlədən prezidentlərlə danışıqlar aparmağı planlaşdırdıqlarını bildirmişdi.
Fatimə İbrahimova
Ölkə.az