Əli Əliyev: "Qubad bəy bəzi addımlarda yanlış qərarlara söykəndi"

"Bundan hamı -Müsavatın rəhbərliyi, Qubad bəy, tərəfdarları, bizlər də uduzuruq"

Dünən Müsavat Divanının keçirilmiş iclasında verilən qərarda partiyanın keçmiş başqanlığa namizədi Qubad İbadoğlunun partiya sıralarından xaric edilməsi barədə Ölkə.az-a Vətəndaş və İnkişaf Partiyasının (VİP) sədri Əli Əliyev açıqlama verib.

"Fikrimcə, bu gözlənilən nəticədir. Buna bənzər prosesi bizlər yaşamışıq. Təcrübədən çıxış edərək deyə bilərəm ki, Qubad bəy bəzi addımlarda yanlış qərarlara söykəndi. Bu xətt onu zəiflədir, əlbəttə ki, təşkilati baxımdan. Yaranmış vəziyyətdə resept olmasa da, ümumi oxşar cəhətlər həmişə olur. Məsləhət səlahiyyətinə malik olmadığımdan, hadisəyə siyasi qiymət vermək istərdim.

Müsavat partiyasında cərəyan edənlər üzücüdür, eyni zamanda labüd olanlardır. İnsanların siyasi özünüifadəsi təbii yolla mümkün olmadığından, real məkanlardan sıxışdırıldığından mübarizənin ağırlığı partiyaların daxilinə keçir. Fəsadlar bu səbəbdən törənir. Hesab edirəm ki, müxalifətin hərəkatlaşma bütövləşmə zərurəti ortada olduğu bir vaxtda belə olaylar heç kəsi sevindirməməlidir. Bundan hamı -Müsavatın rəhbərliyi, Qubad bəy, tərəfdarları, bizlər də uduzuruq. Ruhdan düşmək lazım deyil. Hər ziyanda fayda tapmaq lazımdır.

Qubad bəy yüksək intellektual mahiyyətə malik şəxsdir. Müxalifət daxilində onun özünə xas yeri vardır. İstərdim ki, həm Müsavatı, həm də Qubad bəyin komandası qarşılıqlı ittihamları durdurub, vərəqi çevirib yola davam desinlər. Qarşılıqlı ittihamlar hər 2 tərəfi yıpradır. Onların gələcəkdə birgə olmasının potensialını görmürəm".

Fatimə İbrahimova
Ölkə.az