Politoloq: "Jirinovski sadəcə şou yaradır"

"İnana bilmirəm ki, Jirinovski özü prezident olsa idi, Almaniya və Fransanın bombalanmasına qərar verərdi"

Hər zaman qalmaqallı açıqlamaları ilə diqqət mərkəzində olan Rusiya Dumasının deputatı, RLDP-nın sədri Vladimir Jirinovskinin növbəti ağlasığmaz fikirlərinə politoloq Razi Nurullayevdən şərh gəlib.

Ölkə.az-a danışan politoloq bunu Jirinovskinin növbəti şousu adlandırıb.

"İnana bilmirəm ki, Jirinovski özü prezident olsa idi, Almaniya və Fransanın bombalanmasına qərar verərdi. O, sadəcə şou yaradır və həm də Qərbə mesaj verir.

Mesaj ondan ibarətdir ki, Rusiya geri çəkilməyəcək və əgər Qərb Rusiyaya təzyiq üçün hərbi metodlara əl atmaq barədə düşünərsə, Moskva zərbələr endirə bilər. Yəni cavab netdir: geri çəkilən deyilik. Məncə, Angela Merkel və Fransua Ollandın da fevralın 6-da Moskvada keçirdikləri görüşdə də bu məsələlər barədə mövqelər qətiləşib. Elə buna görə də onların mövqelərində dəyişiklik yaranıb. Hazırda, onlar Ukrayna hakimiyyətinin separatçılara güzəştə getməsini istəyirlər. Geniş səlahiyyətlərin verilməsi elə Şərq vilayətlərinin sonunda müstəqilliyə aparması deməkdir".

Qeyd edək ki, bir neçə gün əvvəl Dumada çıxışı zamanı Jirinovski Rusiya rəhbərliyini Almaniyanı bombalamağa, Parisi yandırmağa çağırmışdı.

Fatimə İbrahimova
Ölkə.az