Millət vəkili: "ATƏT-in həmsədrləri hadisələrə ciddi şəkildə qiymət verməyi bacarmalıdır"

"20 il ərzində heç vaxt bu qədər atəşkəs pozulmasına rast gəlməmişdik"

Bu gün ATƏT-in Minsk qrupunun həmsədrlərinin Azərbaycana səfəri başlayıb.

Sözügedən səfər barədə Ölkə.az-a danışan millət vəkili Siyavuş Novruzov son zamanlar təmas xəttində atəşkəs rejiminin ciddi pozulmasına görə, qarşı tərəfin məsuliyyəti anlamalı olduğunu bildirdi.

"20 ildən artıqdır ki, ATƏT bu məsələ ilə məşğuldur. Hər dəfə səfərə gəlir, təmas xəttində olur, tərəflərlə söhbətlər aparırlar.

Son dövrlər Ermənistan tərəfindən atəşkəs demək olar ki, mütamadi şəkildə pozulur, müxtəlif təxribat xarakterli qruplar Azərbaycan ərazisinə göndərilir. Son 8-9 ayda elə bir gün olmayıb ki, gün ərzində 30-40 dəfə atəşkəs rejimi pozulmasın. İriçaplı silahlardan atəşlər, hətta helikopterlər, o cümlədən pilotsuz təyyarələrin qaldırılmasına qədər olan hadisələr və.s.

20 il ərzində heç vaxt bu qədər atəşkəs pozulmasına rast gəlməmişdik. Bu da Ermənistanın təxribatı ilə bağlı olan məsələdir.

Mən hesab edirəm ki, görüşlər zamanı ATƏT-in həmsədrləri hadisələrə ciddi şəkildə qiymət verməlidir. Atəşkəsi pozan tərəf məsuliyyətini anlamalıdır".

Qeyd edək ki, fevralın 17-də həmsədrlər Yerevana, daha sonra isə Dağlıq Qarabağa yola düşəcəklər. Səfər zamanı Dağlıq Qarabağ münaqişəsinin həlli mövzusunda müzakirələrin aparılması nəzərdə tutulur.

Fatimə İbrahimova
Ölkə.az