Mətn ölçüsü:
  • 100%

AŞPA həmməruzəçiləri Ədliyyə Nazirliyində olublar

Ədliyyə naziri, Məhkəmə-Hüquq Şurasının sədri Fikrət Məmmədov Avropa Şurası Parlament Assambleyası Monitorinq Komitəsinin həmməruzəçiləri Pedro Aqramunt və Tadeuş İvinski ilə görüşüb.

Ədliyyə Nazirliyinin mətbuat xidmətindən APA-ya verilən məlumata görə, görüşdə nazir nazir ötən il ölkəmizin Avropa Şurası Nazirlər Komitəsindəki uğurlu sədrliyini, eləcə də bu mötəbər qurumun Azərbaycan üçün qəbul olunmuş 2014-2016-cı illər üzrə Fəaliyyət Planının icrası üzrə tədbirləri qeyd edib.

F. Məmmədov Azərbaycanda məhkəmə-hüquq sistemində aparılan islahatlar, o cümlədən məhkəmə hakimiyyətinin müstəqilliyinin təmin edilməsi, hakimlərin sayının artırılması, onların Avropa Şurası və Avropa İttifaqı tərəfindən örnək kimi dəyərləndirilən seçimi, Məhkəmə-Hüquq Şurasının fəaliyyəti və onun səlahiyyətlərinin genişləndirilməsi, elektron məhkəmənin tətbiqi, infrastrukturun müasirləşdirilməsi üzrə görülən işlər barədə həmməruzəçilərə məlumat verib. Nazir həmçinin məhkumların saxlanma şəraitinin yaxşılaşdırılması məqsədi ilə bölgələrdə yeni müasir penitensiar müəssisələrin inşası üzrə görülən işlərdən danışıb.

T.İvinski isə ölkəmizdə həyata keçirilən demokratik proseslər barədə məlumatlı olduğunu bildirib. Həmməruzəçilər səfər zamanı penitensiar müəssisələrə baş çəkmək üçün şərait yaradılmasına görə minnətdarlığını ifadə ediblər.

Görüşdə həmçinin qanunvericiliyin təkmilləşdirilməsi, vətəndaş cəmiyyətinin inkişafı, insan hüquqlarının təminatı və digər mövzular üzrə faydalı fikir mübadiləsi aparılıb, maraq doğuran məsələlərə aydınlıq gətirilib. Tədbirdə Avropa Şurasının Bakıdakı Ofisinin rəhbəri Draqana Filipoviç iştirak edib.

Ölkə.az