Hərbi ekspert: "Ermənistanda baş verən son hadisələr vəziyyətin kritik hal aldığına işarədir"
"İrəvanda yerli camaatın səsi eşidilən kimi Qarabağda mütləq bir təxribat törədilir"
"Xaos, əxlaqsızlıq, özbaşınalıq və intizamsızlıq ermənistan ordusu üçün ən xarakterik cəhətlərdəndir. Bu ordunun ali insani dəyərlərə heç bir aidiyyəti yoxdur, mayası haramla yoğrulub. Nə hüquqi baxımdan, nə də mənəvi cəhətdən dayanıqlığı etibarlı özüllər üzərində qurulmayıb. İndi o, yüz illərin çürük ideoloji platformasında patoloji irsi xəstəlikdən əziyyət çəkir. Bu səbəbdən də onun yaxın zamanlarda “kliniki ölüm” keçirəcəyini öz gözlərimizlə görəcəyik".
Bu sözləri Ölkə.az-a danışan hərbi ekspert İbrahim Rüstəmli Ermənistan ordusunun hazırkı vəziyyətini şərh edərkən deyib.
"Sadə ermənilər Qarabağ düyününü siyasi avantüra kimi dəyərləndirir. Əsgər valideynləri iki gündən bir Sarkisyan rejiminə qarşı üsyan qaldırır. O üzdən İrəvanda yerli camaatın səsi eşidilən kimi Qarabağda mütləq bir təxribat törədilir və diqqət süni şəkildə əsas məsələdən yayındırılır.
Lakin ordudakı parçalanmalar, xüsusilə, ikitirəlik getdikcə dərinləşir. İrəvan erməniləri yerli Qarabağ ermənilərinə ikinci “sort” adamlar kimi baxır, onları davamlı şəkildə aşağılayır, hətta zorlamaqdan belə çəkinmirlər. Bu, vəhşiliyin ən iyrənc formasıdır.
Nəticədə ordu sıralarına çağırış zamanı yaranan ciddi problemlərin həlli mümkünsüz hal alır. Fikir verin, təqribən il yarım öncə, hətta orduya bir nəfər də çağırışçı tapa bilmədiklərindən, Ermənistanda fövqaladə iclas keçirilmişdi. Bu, ilk növbədə Qarabağın yerli camaatdan ötrü heç bir siyasi, mənəvi əhəmiyyət daşımadığının göstəricisidir.
Ancaq siyasi elita cəmiyyətin səsini boğmaq məqsədilə, hələ ki, xalqı ayaqlar altına atmaqda, reallığı ört-basdır etməkdə təşəbbüsü əlində saxlayır. İndiki məqamda söhbət yalnız bunun nə vaxta kimi davam edəcəyindən, Sarkisyan rejiminin nə vaxtadək duruş gətirəcəyindən gedir. Reallıq isə amansız diqtəsilə çox inamlı və güclü görünür. Yəni, baş verən son hadisələr vəziyyətin kritik hal aldığına, ermənistan ordusunun süqutuna kifayət qədər ciddi işarədir".
Qeyd edək ki, son günlər Ermənistan ordusunda gərginlik davam etməkdədir.
Fatimə İbrahimova
Ölkə.Az
