Tofiq Yaqublunun dəfnə getməsi üçün Ədliyyə Nazirliyinə

“Müsavat Partiyası başqanının həbsdə olan müavini Tofiq Yaqublunun qızı Nərgizin vəfatı ilə əlaqədar Ədliyyə Nazirliyinə müraciət etməyə gedirəm. Cəzaların İcrası Məcəlləsinə görə Tofiq Yaqubluya 7 gün müddətinə məzuniyyət verilməlidir”.

Bu barədə Modern.az saytına vəkil Nemət Kərimli məlumat verib. O bildirib ki, Tofiq Yaqublunun qızının ölümündən hələ ki, xəbəri yoxdur:

“Hesab etmirəm ki, hakimiyyət Tofiq Yaqublunu qızının yas mərasiminə buraxmayacaq qədər qeyri-humanistlik nümayiş etdirsin. Siyasi mübarizə öz yerində. Yəqin ki, Tofiq Yaqublunu övladının yasına buraxarlar”.

Vəkil onu da əlavə edib ki, Nərgiz Yaqublunun cənazəsi Azərbaycana sabah gətiriləcək.

Nərgiz Yaqublu ötən il ailə qurub, Rusiyada yaşayırdı. Ailə qurmazdan öncə "Yeni Müsavat" qəzetində çalışıb. O, sarılıq xəstəliyindən əziyyət çəkirdi və Tomsk şəhərindəki xəstəxanaların birində müalicə alırdı. Mərhum ana olmağa hazırlaşırdı...

Müsavat Partiyası başqanının müavini Tofiq Yaqubluya Cinayət Məcəlləsinin 220.1-ci (zorakılıqların, talanların, yanğınların törədilməsi, əmlakın məhv edilməsi ilə müşayiət olunan kütləvi iğtişaşları təşkil etmə və ya belə iğtişaşlarda iştirak etmə) və 315.2-ci (hakimiyyət nümayəndəsinə zor tətbiq etmə və ya müqavimət göstərmə) maddəsi ilə ittiham irəli sürülüb. O, 2013-cü il yanvarın 23-də və 24-də İsmayıllıda baş vermiş aksiyalar zamanı ictimai qaydanı pozmaqda və vətəndaşları iğtişaşlara təhrik etməkdə təqsirləndirilib.

Məhkəmənin hökmü ilə Tofiq Yaqublu 5 il müddətinə azadlıqdan məhrum edilib.

Ölkə.Az