Azərbaycan və Qazaxıstan arasında əməkdaşlıq müqaviləsi imzalanacaq

Mədəniyyət və Turizm Nazirliyinin sistemində fəaliyyət göstərən Respublika Mədəniyyət Müəssisələri Hazırlıq və İxtisasartırma Mərkəzi Qazaxıstanın Qazax Milli İncəsənət Akademiyası ilə əməkdaşlıq müqaviləsi imzalamağı nəzərdə tutur.

Nazirlikdən Ölkə.Az-averilən məlumata görə, Qazax Milli İncəsənət Akademiyası ilə əməkdaşlıq əlaqələrinin yaradılması, habelə akademiya tərəfindən təşkil olunan mədəniyyət siyasəti üzrə beynəlxalq elmi ustad-sinifləri çərçivəsində “Müasir çağırışlar və mədəniyyət siyasəti: Azərbaycan təcrübəsi” mövzusunda mühazirələrin aparılması məqsədilə Nazirliyin Elm, təhsil və gənclərlə iş şöbəsinin Elm sektorunun müdiri Asif Usubəliyev aprelin 21-25-də Almatı şəhərinə ezam olunub.

Səfər zamanı treninqlərin aparılması ilə yanaşı Nazirliyin nümayəndəsi Qazax Milli İncəsənət Akademiyasının rəhbərliyi ilə apardığı danışıqlar nəticəsində sözügedən müəssisənin Nazirliyin sistemində fəaliyyət göstərən Respublika Mədəniyyət Müəssisələri Hazırlıq və İxtisasartırma Mərkəzi ilə əməkdaşlıq müqaviləsinin imzalanmasına dair razılıq əldə olunub. Əməkdaşlıq çərçivəsində birgə tədbirlərin həyata keçirilməsi, qarşılıqlı təcrübə mübadiləsi və xüsusi olaraq Akademiyanın xarici tərəfdaşları olan Avropanın nüfuzlu ali məktəblərinin nümayəndələri tərəfindən müxtəlif mövzulara həsr olunmuş təlimlərin Azərbaycanda təşkili nəzərdə tutulur.

Ölkə.Az