"ABŞ görür ki, siyasi yolla vəziyyəti nəzarətə ala bilməyəcək, ona görə də xaos yaratmaq istəyir"

NATO-nin Avropadakı qüvvələrinin komandanı general Filip Bridlav Rusiyanın Donbasa hücuma hazırlaşdığını bildirib.

Filip Bridlavın sözlərinə görə, Rusiya atəşkəsdən öz silahlı birləşmələrini yenidən səfərbər etmək və yeni atəş nöqtələri yaratmaq üçün istifadə edir.

Dünyada baş verən son proseslərin fonunda isə ABŞ builki hərbi büdcəsini 40 milyard dollar artırıb.

Bu geosiyasi prosesləri politoloq Mübariz Əhmədoğlu Ölkə.az-a verdiyi açıqlamasında şərh edib.

Mübariz Əhmədoğlu: "NATO-nun Avropadakı qüvvələrinin komandanı Filip Bridlav əslində NATO-da ABŞ-ın hərbi inhisarçısıdır. Onun məqsədi ancaq ABŞ-ın siyasətini reallaşdırmaqdır. Ukrayna məsələsinə görə Avropa ilə ABŞ arasında fikir ayrılığı var. Hətta Kerri də bunu təsdiqlədi. Belə bir dövrdə Filip Bridlav aktivləşməklə antirusiyaçılığı qızışdırmaqdadır. O, Rusiyanın Ukraynada oynadığı rolu neqativ formada təqdim edir ki, Avropanın Rusiya ilə əməkdaşlıq etmək istəyən dövlətlərini yenidən əvvəlki mövqeyinə qaytarsın.

Ukrayna hadisələrində ABŞ-ın uduzduğu bəllidir. ABŞ görür ki, siyasi yolla vəziyyəti ələ ala bilməyəcək, ona görə də, xaos yaratmaq istəyir. Son dövrlərdə Ukrayna məsələlərinə daha çox ABŞ və NATO hərbiçiləri münasibət bildirir. Filip Bridlav hər həftə Ukrayna hadisələri ilə bağlı hərbi konteksdə antirusiya mövqeli fikirlər bildirir. Hətta yaxın günlərdə Filip Bridlav bildirmişdi ki, ABŞ Ukraynaya öldürücü silahlar verəcək. Bu vaxta qədər ABŞ Ukraynaya müdafiə edici silahlar verirdi".

Mübariz Əhmədoğlu ABŞ-ın hərbi büdcəsini artırmasına münasibət bildirərək, "Dünyada hal-hazırda geosiyasətin işləməsində lənglik var. Dövlətlər siyasətlə, dialoqla istədiklərini əldə edə bilmir. Son iki ayda dünyada baş verən proseslərdə hərbi qüvvələrin payı artıb. Hazırda ABŞ-ın hərbi büdcəsini artırmaqda iki məqsədi var, birincisi: Rusiyaya güclü zərbə vurmaq; ikincisi isə Yəmən hadisələrində İranla hərbi əməliyyatlara hazırlaşmaq. Son danışıqlarda İran ABŞ-dan istədiyini aldı. ABŞ indi ikifikirlidir. ABŞ ehtiyat edir ki, İran Yəmən hadisələrində çox uzağa gedə bilər. İran həm İraqda, həm də Yəməndə öz mövqeyini ortalığa qoydu. Hörmüz boğazında ABŞ hərbi gəmilərii var. Guya ABŞ Marşal adalarını qoruyur, ancaq əslində Marşal adaları ABŞ-ın oyuncağıdır. Ola bilsin ABŞ Hörmüz boğazına əlavə qüvvə də cəlb etsin" deyə vurğulayıb.

Səxavət Məmməd
Ölkə.az