Politoloq: \"Rusiya həqiqətən İŞİD-lə mübarizəni vəzifələrindən sayırsa, niyə Anti-İŞİD koalisiyasına qoşulmur?\"
Rusiya Təhlükəsizlik Şurasının katibi, FTX-nin keçmiş direktoru Nikolay Patruşevin Azərbaycana səfəri başa çatıb.
Səfərdə təhlükəsizlik məsələləri, Avropa Oyunları ərəfəsində İŞİD təhlükəsi ilə bağlı Azərbaycan rəsmiləri ilə informasiya mübadiləsi aparıldığı deyilir.
Nikolay Patruşevin Azərbaycana səfərini, İŞİD-in Azərbaycan üçün nə dərəcədə təhlükəli oluduğunu politoloq Ərəstun Oruclu Ölkə.az-a şərh edib.
Ərəstun Oruclu: "Rusiya Azərbaycanda bir çox sahədə öz təsir dairəsini genişləndirməyə çalışır, o cümlədən də təhlükəsizlik sahəsində. Qarşıdan gələn Avropa oyunları Rusiya üçün əla şansdır. Rusiya Azərbaycana təhlükəsizlik sahəsində əməkdaşlıq təklif edir. Bu da istənilən halda Rusiya təsirinin güclənməsi deməkdir.
İŞİD təhlükəsi deyirlər. Niyə İŞİD təhlükəsi məsələsi Rusiya tərəfindən anons edilir? Rusiya öncə özü öz təhlükəsizliyi haqqında düşünməlidir. Ona görə ki, İŞİD-in tərkibində döyüşən xarici muzdluların bəlkə də ən böyük hissəsi Rusiya vətəndaşalarıdır. Belə olan halda Rusiyanın Azərbaycanın qayğısını çəkməsi həddindən artıq sentimental bir hissə bənzəyir. Rusiya bu amildən istifadə edərək, Azərbaycanı bir növ İŞİD faktoru ilə qorxudaraq çalışır ki, öz təsir dairəsinə salsın. Rusiya ilkin mərhələdə terrora qarşı mübarizədən, informasiya mübadiləsindən başlayıb. Sonradan Azərbaycanı anti-terror əməliyyatları, hərbi əməliyyatlar və.s tipli əməkdaşlığa çəkmək istəyir.
Biz hamımız çox gözəl bilirik ki, anti-İŞİD koalisiyasında Rusiya yoxdur. Rusiya həqiqətən İŞİD-lə mübarizəni vəzifələrindən sayırsa, niyə bu koalisiyaya qoşulmur və gəlib Azərbaycana İŞİD-dən qorunmaq üçün "yol göstərir"? Rusiyanın bütün oyunu "ayının bütün oyununun bir armudun üzərində" olduğu lətifəsinə bənzəyir. Nikolay Patruşevin səfəri, ondan əvvəl verilən açıqlamalar, bəyanatlar bunun hamısı eyni məqsədə xidmət edir, Azərbaycanı özünün geosiyasi təsir dairəsinə salmaq və onun beynəlxalq aləmlə əlaqələrini kəsmək. Azərbaycanın daxilində də bunun üçün çalışanlar var.
- Azərbaycan Avropa oyunları ərəfəsində öz təhlükəsizliyini özü qoruya bilər?
- Dünyada heç bir dövlət özünün təhlükəsizliyini təkbaşına qoruya bilməz. Terror milli xarakter daşımır. Terror artıq qloballaşıb. Söhbət artıq qlobal terrorizimdən gedir. Əgər söhbət qlobal terrorizimdən gedirsə, qlobal da anti-terrorizim olmalıdır. Burada hansısa dövlət təkbaşına, hətta ABŞ da təkbaşına bununla mübarizə apara bilməz. Ancaq burada məhz Rusiyanı partnyor, müttəfiq seçmək özünü dünyadan təcrid etmək deməkdir. Bu bizim milli maraqlarımıza cavab vermir.
Səxavət Məmməd
Ölkə.az