Politoloq: "Ərdoğan bütün vasitələrdən istifadə edib bu işi pozacaq"
CHP lideri Kamal Kılıçdaroğlu MHP-nin rəhbəri Dövlət Baxçalıya MHP-HDP-CHP koalisiyası və baş nazirlik təklif edib.
Hər kəs AKP-MHP koalisiyası gözlədiyi bir zamanda CHP-nin bu təklifi maraqla qarşılanıb. Təklif nə qədər maraqlı olsa da iki əks qütbdə dayanan MHP və HDP-nin bir araya gəlməsi mümkünsüz görünür.
Kılıçdaroğlunun MHP-yə bu təklifini millət vəkili Fazil Mustafa və politoloq Qabil Hüseyinli Ölkə.az-a şərh ediblər.
Fazil Mustafa: "Bu real deyil, çünki MHP HDP ilə hər hansısa koalisiyaya getsə, o zaman MHP çox böyük güc itirəcək. Hal-hazırda real ola biləcək yeganə koalisiya MHP-AKP kualisiyası ola bilər. CHP bu prosesdə dezavantajlı vəziyytə düşməmək üçün belə bir addım atır. Çünki sabah deyilməsin ki, erkən seçimin günahı CHP-dədir.
Qabil Hüseyinli: "CHP-nin təklifi çox maraqlıdır. Türkiyə üçün əhəmiyyətli olan təklifdir, amma təssüflər olsun ki, HDP bu varianta razı olmayacaq, eyni zamanda AKP-nin faktiki rəhbəri Ərdoğan da bütün vasitələrdən istifadə edib bu işi pozacaq. HDP heç zaman buna getməyəcək, ona görə ki, kürdlərin iddiaları çoxdur, məsələn konstitusiyanın dəyişdirilməsi, konistitusiyada kürdlərə federal muxtariyyətin verilməsi, kürd dilinin dövlət dili olması kimi cəfəng iddialar var. Demokratikləşmə ilə bağlı MHP bu koalisiyaya gedər, ancaq kürdlərlə bağlı məsələlərdə MHP ciddi həssasiyyata malikdir və bunu da qoruyacaq".
Səxavət Məmməd
Ölkə.az