Bu məkrli planlar Fransanın öz başında çatlayacaq - Açıqlama
“Fransa Milli Assambleyasının Azərbaycanla bağlı qəbul etdiyi qətnamənin müddəalarına diqqət yetirəndə bir daha görürəsən ki, sənəd beynəlxalq hüquqa tamamilə zidd, təhriflər və iftiralara əsaslanaraq hazırlanıb. Sənəddə deyilir ki, guya Azərbaycan Ermənistan ərazisini işğal edib və hazırda 50 km2 ərazisi hələ də işğal altındadır. Amma nədənsə Fransanın qanunverici orqanı 30 ildir ki, Azərbaycanın hələ də 7 yaşayış məntəqəsinin Ermənistanın işğalı altında olduğunu unudur. Bu bir daha göstərir ki, Ermənistan hələ də revanşist, işğalçı siyasətindən əl çəkməyib və bu siyasətini davam etdirmək istəyir. Fransa da beynəlxalq hüququ ayaqlar altına ataraq Ermənistanın işğalçılıq siyasətinə hər vasitə ilə dəsətk verir. Fransa qanunverici orqanın sonuncu sənədi bunun bariz nümunəsidir”.
Bunu “Ölkə.Az”a açıqlamasında deputat İltizam Yusifov deyib. Onun sözlərinə görə, Fransanın Ermənistanın işğalçılıq siyasətinə dəstək verməklə Cənubi Qafqazla yanaşı, Avropa qitəsinin təhlükəsizlik arxitekturasını təhdid altında qoymuş olur. “ Azərbaycan uzun illərdir ki, Avropanın enerji təhlükəsizliyinin təmin olunmasında müstəsna rola malikdir. Amma Rusiya-Ukrayna müharibəsi fonunda Avropanın daha ciddi enerji təhlikəsizliyinə ehtiyac olduğu halda, hazırda Avropa İttifaqına sədrlik edən Fransa yanlış siyasəti nəticəsində qlobal təhlükəsizlik sisteminə ciddi surətdə təhlükə yaratmış olur”- o qeyd edib.
O əlavə edib ki, qətnamədə Azərbaycana iftira atılaraq, guya ölkəmizdə hərbi əsirlərin saxlandığı, zor yolu ilə Zəngəzur dəhlizinin açılması qeyd olunur. “Lakin nədənsə, 44 günlük Vətən müharibəsindən sonra imzalanan bəyanatların müdəalarını görməməzlikdən gəlirlər. Məhz imzalanmış sənədlərə əsasən Ermənistan Azərbaycanla Naxçıvan arasında gediş-gəlişi təçmin edən dəhlizi yaratmaq barədə üzərinə öhdəlik götürüb.
İkinci bir məqam isə “əsir və girovlarla” bağlıdır. Bu gün Azərbaycanda erməni ordusunun heç bir əsiri yoxdur. Varsa da, onlar terrorçu və hərbi cinayətkarlardır. Hansı ki, 2020-ci il 10 noyabr sülh bəyanatından sonra törətdikləri hərbi cinayətlərə görə saxlanılıblar və ədalət məhkəməsi qarşısında cavab verirlər”.
Sənəddə Türkiyə ilə bağlı müdəaya gəldikdə deputat qeyd edib ki, Azərbaycanla Türkiyə qardaş və strateji müttəfiq ölkədir: “İkincisi, Azərbaycan-Türkiyə müttəfiqliyi və birgə əməkdaşlığı təkcə Cənubi Qafqaz bölgəsində deyil, bütövlükdə Qərblə Şərq arasında sıx bir əməkdaşlıq formatının yaranmasına xidmət edir. Fransa qanunverici orqanlarının Azərbaycan qarşı qəbul etdikləri sənədlər birmənalı şəkildə bölgədə gərginliyin davam etməsinə, mərkli planların reallaşmasına xidmət edir. Lakin Makron unudur ki, planlaşdırdığı məkrli planlar öz başında çatlayacaq və bundan səbatsız, marginal qrupların maraqlarına xidmət edən siyasətdən uduzan tərəf ancaq Fransa dövləti və xalqı olacaq”.
Deputat qeyd edib ki, Ermənistan-Azərbaycan münaqişəsinin 30 ilə yaxın müddətdə həll olunmamasının əsas səbəbkarı ATƏT Minsk qrupunun həmsədr ölkələrinin yürütdüyü yarıtmaz siyasət oldu: “ ATƏT MQ həmsədr ölkələri işğalçı ilə işğala məruz qalan arasında bərabərlik işarəsi qoydu. Onlar, başda Fransa olmaqla münaqişəsinin sülh yolu ilə həlli əvəzinə Ermənistanı işğalçılıq siyasətini davam etdirməyə sövq etdilər. ATƏT MQ həmsədr ölkələri bölgədə sülhün yaranmasına deyil deyil, gərginliyin davam etməsi istiqamətində fəaliyyət göstərdilər. Bunu görən Azərbaycan bütün məsuliyyəti üzərinə götürərək, məsələni həll etməli oldu.
Fransa 44 günlük müharibədən sonra proseslərdən nəticə çıxarmaq əvəzinə, öz məkrli planlarını həyata keçirməkdə davam etdi. Fransa bölgdə sülhün yaradılması altında prosesdə iştirak etməyə cəhd edir. Lakin onun sərgilədiyi qərəzli mövqe Fransanın bir vasitəçi kimi iştirakını mümkünsüz edir. Onun sülhyaratma prosesində iştirakı heç cür ola bilməz və bu mümkün deyil”.
Mürtəza
Ölkə.Az