“Sülhməramlıların çıxarılmasını sürətləndirməliyik, 5 ili gözləməli deyilik” – Hərbi ekspert

“Rusiya sülhməramlılarının fəaliyyəti tamamilə üçtərəfli birgə bəyanatın şərtlərinə ziddir”.

Bu sözləri Ölkə.Az-a açıqlamasında hərbi ekspert Ədalət Verdiyev Qarabağdakı sülhməramlıların azərbaycanlı jurnalistlərin Xocalıya keçidinə maneə yaratması ilə bağlı danışarkən deyib. Ekspertin sözlərinə görə, onlar üzərlərinə düşən funksiyaları yerinə yetirməməklə bərabər, həm də azərbaycanlı jurnalistləri səfərdə olan mütəxəssislərlə birlikdə fəaliyyətinə məhdudiyyətlər yaradıblar:

“Ən dəhşətli olanı da odur ki, azərbaycanlı jurnalistləri orada saxlayan hərbçilər heç də Rusiya ordusunun hərbçiləri deyil. Onların geyim formasında Rusiya nişanları olsa da, hərbi forması və baş geyimi sülhməramlı kontingentinin formasından tamamilə fərqlənir.

Azərbaycan vətəndaşı öz ərazisinə buraxılmır, amma gözümünüz önündə 27 nəfər iran vətəndaşı 2 partiyada ora gedib çıxır.

Bundan başqa, bizim jurnalistimiz orada olan zaman Gürcüstan nömrə nişanlı avtomobil Qarabağa daxil oldu. Daha əvvəl də fransalı prezidentliyə namizəd Qarabağa gedib çıxmışdı və s. və ia. Yəni rus azərbaycanlıdan, türkdən başqa o əraziyə kimi istəsə buraxır”.

Ekspert hesab edir ki, belə olan halda Rusiya sülhməramlılarının Qarabağdan çıxarılması üçün onların xidmət dövrünün başa çatmasını gözləmək lazım deyil:

“Bu, bir daha onu göstərir ki Rusiya sülhməramlıları Azərbaycan ərazisində mövcud olan erməni silahlılarını həmin ərazidən çıxarmaq əvəzinə onlarla birlikdə Azərbaycana qarşı qeyri-qanuni fəaliyyətlərdə müştərək iştirak edirlər.

Rusiya sülhməramlı kontingentin ərazidən çıxarılması üçün fəaliyyətlərimizi sürətləndirməliyik. 5 ilin bitməsini gözləməli deyilik. Qarabağda mövcud olan erməni silahlılarının zəmanətçisi ilk növbədə Rusiya sülhməramlılarıdır. Bu, artıq aşkardır”, - deyə o söyləyib.

Xatırladaq ki, Azərbaycan, Rusiya prezidentlərinin və Ermənistan baş nazirinin arasında imzalanan 10 noyabr bəyanatında qeyd olunur ki, Rusiya Federasiyasının sülhməramlı kontingentinin Qarabağda qalma müddəti 5 ildir. Tərəflərdən heç biri müddətin bitməsinə altı ay qalmış bu müddəanın tətbiqinə xitam vermə niyyətini ifadə etmədiyi halda qalma müddəti avtomatik beş illik müddətə artırılır.

Billurə Yunus