Politoloq: "Razi Nurullayev hakimiyyətə lazım deyil"
Ölkədəki siyasi sükutu AXCP-dən ayrılıb əsl AXCP yaradacağını elan edən Razi Nurulayev pozdu.
Razi Nurullayev Əli Kərimlini "Qərbin oyuncağı" elan edərək AXCP-ni onun əlindən alacağını bildirdi. Cəbhəçilər isə öz növbəsində Razi Nurullayevi hakimiyyətin oyuncağı adlandırırlar.
Baş verən bu qarmaqarışıq siyasi prosesləri politoloq Qabil Hüseynli Ölkə.az-a verdiyi açıqlamasında şərh edib.
Paralanmış AXCP...
Qabil Hüseynli öncə AXCP haqqında fikrini bildirdi: "AXCP ölkədə yaranmış ilk ictimai-siyasi təşkilatlanmadır. Azərbaycan xalqının imperiyaya qarşı təşkilatlanmasında önəmli rol oynayan bir siyasi təşkilatdır. Sonradan bu ictimai-siyasi təşkilatın bazası üzərində cəmiyyətdə siyasi partiyalaşma prosesi getdi və müxtəlif siyasi partiyalar məhz AXCP-nin vaxtı ilə üzvü olmuş, onun aparıcı fiquruna çevrilmiş adamlar tərəfindən formalaşdırılaraq siyasi səhnəyə atıldılar. O zaman baş verənlər normal siyasi partiyalaşma prosesi idi və heç kim də buna ciddi etiraz etmirdi. Son dövrlərdə AXCP həqiqətən də ciddi parçalanmalara məruz qalır. Bu parçalanmalardan da kiçik, orta səviyyəli yeni partiyalar yaranıb formalaşıb".
Razi Nurullayev nə vəd edir?
Politoloq Razi Nurullayevin keçirdiyi mətbuat konfransı haqqında isə bunları dedi: "Razi Nurullayevin yanaşmasına bir qədər fərqli baxmaq lazımdır. Cəmiyyətdə müəyyən məsələləri siyasi əxlaq və siyasi mənəviyyat nəzərindən görmək lazımdır. Qəbul edirəm ki, Əli Kərimli partiyada avtoritar bir idarəçilik üsulu yaradıb. Razi Nurullayev bu avtoritar idarəçilik üsulunu elə partiya daxilində mübarizə apara-apara, Əli Kərimlinin özünü və yaxud partiyanın özünü demokratikləşməyə məcbur etmək əvəzinə oradan çıxır və başına 3-5 adam toplayaraq yeni bir partiya yaratdığını elan edir. İnanmıram ki, Razi Nurullayevin yaradacağı partiya cəmiyyətdə siyasi proseslərə təsir etmək imkanlarına malik olsun. Partiya yaranmamış "möhürü Əli Kərimlinin əlindən alacam" deməsinin özü də siyasətçiyə yaraşmayan bir ifadədədir. İndiyə qədər yaranan siyasi partiyalar partiyadan qopub ayrılıb, fərqli bir siyasi təşkilat yaranıb, adı da fərqli olub. İdeoloji-siyasi platformaları oxşar olsa da siyasi kursları, yeritdikləri siyasət praktiki müstəvidə bir-birindən fərqli olub, didişməyə getməyiblər. Azərbaycan cəmiyyətini didişməyə, qarşıdurmaya aparmayıblar. Razi Nurullayev Azərbaycan cəmiyyətinə siyasi müstəvidə lokal qarşıdurma vəd edir. Bunun cəmiyyətə xeyir gətirəcəyinə inanmıram. Əli Kərimlinin avtoritarizmlə cəmiyyətin siyasi ənənələrinə ziyan vurduğunu qəbul etsək də, bu cür mübarizə forması cəmiyyətdə yayqınlaşmamalıdır".
"Layihə", yoxsa öz xidmətini təklif edən adam?
Qabil Hüseynli hər iki tərəfin qarşılıqlı ittihamlaşmalarını isə bu cür şərh edib: "Hakimiyyət Razi Nurullayevin ümidinə qalmayıb. Hakimiyyətin kifayət qədər cəmiyyətdə dayaq nöqtəsi var. Əli Kərimli seçkilərə getmir. Ona görə də, hakimiyyətin seçkilər ərəfəsində Əli Kərimli, AXCP və Milli Şura ilə mübarizəsinə ehtiyac da qalmayacaq. Razi Nurullayevin "layihə" olduğuna inanmıram. Razi Nurullayevin özü bu təşəbbüsdə ola bilər. Kiməsə öz xidmətini təklif edə bilər, ancaq hakimiyyətin AXCP-yə qarşı Razi Nurullayevdən istifadə etmək planının olmasına və yaxud belə bir layihəsini işə salmasına heç inanmıram"
Səxavət Məmməd
Ölkə.az
