Səxavət Əlisoy: "Saxta yolla partiya sədri olmuş şəxsin demokratiyadan danışmağa haqqı yoxdur"

Müsavat Partiyasının qurultayının nəticələrinin ləğvi ilə bağlı Ədliyyə Nazirliyinə edilən şikayətlə bağlı Müsavat başqanının müavini Elman Fəttahı nazirliyə dəvət ediblər

Müsavat başqanının müavini bildirib ki, ona şifahi suallar veriblər. Elman Fəttah isə yazılı cavab verəcəyini deyib. Elman Fəttah bu məsələdə ADR-i günahlandırıb və ADR-i Müsavata qarşı yaradılan hərəkat adlandırıb.

Qurultayın nəticələri ləğv olunmalıdırmı? Ədliyyə Nazirliyi nəticələri ləğv edəcəkmi?

Bu sualları ADR üzvü, keçmiş Müsavatçı Səxavət Əlisoy Ölkə.az-a verdiyi açıqlamasında cavablandırıb.

Səxavət Əlisoy: "Birincisi, Ədliyyə Nazirliyində nə sual veriblər, onlardan nə istəyirlər, ADR Hərəkatı olaraq bu bizi maraqlandırmır. İkincisi ADR Hərəkatı Müsavatda baş verən saxtakarlıqla ilgili heç bir rəsmi orqana müraciət etməyib.

Üçüncüsü, Müsavat Partiyasını saxta seçki ilə ələ keçirənlər nədən bütün sancılarının baisi kimi ADR Hərəkatını görürlər və bu da hər kəsə bəllidir? Nədən ki, o partiyada ictimai nüfuzu olan, siyasi reytinqə malik vur-tut iki cüt bir tək adam qalıb. O adamlar da saxtakarların əsl simasına bələd olduqdan sonra onlarla vidalaşacaq və partiya da qalacaq başlı-başına. Arif Hacılının "züytutanlar orkestri" də gah bu havanı, gah da digər havanı çalıb özləri oynayacaqlar.

Ədliyyə Nazirliyinin hansı qərar verməsi şəxsən mənim üçün önəmli deyil. Bu adamlar Müsavat Partiyasının təməl prinsiplərindən birinə - Ləyaqətçilik prinsipinə riayət etsəydilər, indiyə qədər istefa verib gedərdilər. Saxta yolla partiya sədri olmuş şəxsin demokratiyadan danışmağa haqqı yoxdur. Təəssüf ki, nə Hacılı nə də onun zavallıları bunu dərk etmək iqtidarında deyillər".

Səxavət Məmməd
Ölkə.az