Politoloq: "Rusiya başa düşür ki, geri çəkilsə, vəziyyəti çətin olacaq"

Ali Rada dövlət idarəçilik sisteminin qismən mərkəzsizləşdirilməsinin lehinə qərar çıxardıqdan sonra Ukraynada daxili ictimai-siyasi vəziyyət yenidən qarışıb

Qərarın nəticəsindən narazı qalanlar Ali Radanın qarşısına yığışaraq aksiya keçiriblər. Aksiya zamanı polis və aksiya iştirakçıları arasından xəsarət alanlar olub.

Ukrayna prezidenti Pyotr Poroşenko isə qarışıqlığın baş verməsində Rusiyanı günahlandırıb.

Ukraynada baş verən son olayları politoloq Ərəstun Oruclu Ölkə.Az-a verdiyi açıqlamasında şərh edib.

Ərəstun Oruclu: "Poroşenkonun dediyi həqiqətdir. Rusiya maksimum dərəcədə Ukraynanı qarışdırmağa çalışır. Ukraynanın öz nəzarətindən çıxmasının qarşısını almağa çalışır. Rusiya Ukraynaya yeridilmiş müxtəlif təxribatçıların, diversantların, terrorçuların köməyi ilə bu ölkəni yenidən nəzarətə götürmək istəyir. Rusiya Ukraynadakı sosial, iqtisadi və siyasi sabitliyi pozmağa cəhd edir.

Rusiya geri çəkilmir. Ukrayna məsələsinə görə Rusiyaya beynəlxalq təzyiqlər güclənib. Rusiya başa düşür ki, geri çəkilsə, vəziyyəti çətin olacaq. Putin Rusiya əhalisini anti-Ukrayna və anti-Qərb notu üzərində kökləyib. Geri çəkilmək məhvə bərabərdir. Ona görə də, bu proses xeyli davam edəcək. Rusiyanın tam zəifləməsinə qədər uzanacaq.

Uzun müddət Azərbaycan, Ukrayna kimi ölkələr Rusiyanın əyaləti olub. Rusiya bu kimi ölkələrdə geniş cəsus şəbəkəsi qurub və indi o şəbəkəni hərəkətə keçirib, ona görə də Qərbə meyl edənlər bənzəri problemlərlə üzləşirlər".

Qeyd edək ki, Ukraynada son il yarımda baş verən hadisələr zamanı Krım Rusiya tərəfindən ilhaq olunub, Donbas və Luqansk vilayətlərinin bir hissəsi də rusiyapərəst üsyançıların nəzarətinə keçərək Kiyevdən ayrılıb.

Səxavət Məmməd
Ölkə.Az