"Gənclər polis dəyənəyi ilə üzbəüz qalanda yaxşı idi, ancaq namizəd olanda pis?"

2015-ci il parlament seçkiləri gənc namizədlərin çoxluğu ilə diqqət çəkir

Gənclərin namizədliyi bəzi yaşlı siyasətçilər tərəfindən birmənalı qarşılanmır. Hətta Sərdar Cəlaloğlu buna görə gəncləri tənqid də edib. Bu tənqidə deputatlığa gənc namizədlərdən olan, D18 hərəkatının sədri Ruslan İzzətli Ölkə.Az-da cavab verib.

Ruslan İzzətli: "Parlamentin tərkibinin formalaşması xalqın səsindən asılıdır. Xalq namizədlərin platformalarına baxaraq səs verir. Partiyaların parlament seçkilərində iştirak edəcəyi namizədlərinin siyahısına baxdıqda görürük ki, gənclər azlıq təşkil edir. Bunun bir çox səbəbi var. Gənclərin çoxu siyasətdən qorxur, siyasətdə insanlar daha çox təzyiqə məruz qalır, maddi və mənəvi sıxıntı ilə üzləşir. Xaricdə təhsil alan gənclərimiz isə özəl şirkətlərdə və xaricdə işləməyi daha üstün tutur.

Gəncliyin siyasətə gəlməsindən, siyasətə gələn şəxsin seçkili orqanlarda iştirak etməsindən həm dövlət, həm də cəmiyyət qazanır. Gənc siyasətdədirsə orada bir yenilik, bir dinamiklik var. Çox təəssüf ki, Azərbaycanda bu ənənə özünü doğrultmur. Həm mətbuatda, həm sosial şəbəkələrdə namizədlərin ilkin siyahısını 2010-cu il parlament seçkiləri ilə müqayisə etsək, görərik ki, bu seçkilərdə gənclər çoxluq təşkil edir. Gənclər sosial şəbəkədə və mətbuatda digərlərindən fərqli olaraq daha ciddi kampaniya aparırlar. Kampaniyasına bu qədər ciddi yanaşan gənclik seçildikdən sonra da insanların problemləri ilə daha yaxından maraqlanacaq.

Gənclərin seçkiyə qatılması çox doğru bir addımdır. Gənclər həbsxanaya düşəndə, mitinqlərə çıxanda, polis dəyənəyi ilə üzbəüz qalanda yaxşı idi, ancaq namizəd olanda pis?"

Qeyd edək ki, Ruslan İzzətli 33 saylı Xətai seçki idarəsindən namizədliyini irəli sürüb.

Səxavət Məmməd
Ölkə.Az