Azərbaycanda sabitliyi pozmaq üçün uğursuz cəhdlər edilib - Aydın Hüseynov 

“Müstəqil siyasət yürüdən, Cənubi Qafqazda  stabilləşdirici rola malik olub yeni dünya düzənində ciddi aktor rolu oynayan Azərbaycan bəzi xarici güclərin qısqanclığına səbəb olmaqla yanaşı, onları narahat edir. Buna görə də Azərbaycanın dünyada durmadan artan nüfuzunun, davamlı inkişafının qarşısını alıb sabitliyi pozmaq üçün ən müxtəlif cəhdlərə əl atırlar. Biz zaman-zaman bunun şahidi olmuşuq və son vaxtlarda həmin qüvvələr yenidən aktivləşməyə başlayıb”. 

Bunu “Ölkə.Az”a açıqlamasında deputat Aydın Hüseynov deyib.

Onun sözlərinə görə, həmin xarici güclər və ölkələr təzyiq vasitəsi ilə bunu edə bilmədikdə, daxildəki əlaltılarını aktivləşdirib onları dəstəkləməklə buna nail olmaq istəyirlər: 

“Azərbaycanda sabitliyi pozmaq üçün zaman-zaman müxtəlif uğursuz cəhdlər edilib. Bu cəhdlərin iştirakçıları bir qayda olaraq eyni qruplar və simalardır. Qərb həmin əlaltılarından Azərbaycanın əldə etdiyi uğurlara kölgə salmaq üçün istifadə edir. Amma həmin güclər unudurlar ki, bu metodlarla Azərbaycanda sabitliyi və həmrəyliyi pozmaq mümkünsüzdür. Çünki xalq müdrik və uzaqgörən, onu uğurlara götürməyi bacaran liderin, cənab Prezident İlham Əliyevin ətrafında bir yumruq kimi birləşib və Azərbaycan cəmiyyətində  həmrəylik hökm sürməkdədir. Xalq Azərbaycan düşmənlərinin hər zaman  pusquda olduğunu bildiyindən ayıq-sayıqdır. Bu ayıq-sayıqlıq da belə qüvvələrə ölkədə sabitliyi pozmaq və onun daxili işlərinə müdaxilə etməyə imkan verməyib buna qarşı çıxacaq. Hər zaman olduğu kimi növbəti dəfə də Cəmil Həsənli kimilərin oyunları puça çıxacaq və iflasa uğrayacaqlar. Onsuz da Azərbaycan cəmiyyətində onların dəstəkləyən kimsə yoxdur. Bu insanlar  öz hərəkətləri ilə özlərini çoxdan ifşa ediblər və bundan sonra onların geniş ictimai kütlə tərəfindən dəstəklənməsi qeyri-mümkündür”.

Mürtəza
Ölkə.Az