Aysel Əlizadə: "YAP mənə böyük dəstək verdi"

“125-lər" Siyasi Klubunun 8 saylı Binəqədi 1-ci seçki dairəsindəni namizədi - Aysel Əlizadə (Alim qızı) Yeni Azərbaycan Partiyasının eyni ad və soyadı daşıyan üzvünün namizədliyinin məhz bu dairədən irəli sürülməsinə münasibət bildirib

A.Əlizadə Ölkə.Az-a açıqlamasında bildirib ki, mövcud durum təşviqat dövrü üçün müəyyən problemlər yaratsa da, onun işinə də yarayıb:

"Düşünürəm ki, Aysel Əlizadə ad və soyadlı ikinci namizədin olması bizə problem yaratmayacaq. Düzdür, seçici çaşa bilər. Amma onlar məni tanıyırlar və bilirlər ki, bu dairədən dünənə kimi Aysel Əlizadə adlı namizəd mən idim. YAP-ın siyahısı dünən açıqlanıb. Təşviqat dönəmində də bu məsələni bir az fərqli şəkildə izah etməliyik. İşimiz bir az artdı. Əgər "Aysel Əlizadəyə səs verin" deyəcəkdiksə, indi deməliyik ki, YAP-ın da bu ad və soyadı daşıyan namizədi var və o namizəd mən deyiləm. Fikrimcə, bundan öz xeyrimizə də istifadə edə bilərik. Dünəndən bu məsələ böyük rezonans doğurdu. Xeyli saytlarda, "Facebook" səhifələrində müzakirə gedir. Özüm istəmədən təşviqatım başlayıb və burada YAP-ın böyük rolu oldu, sağ olsunlar. YAP istəmədən mənə böyük dəstək verdi. Bunu belə qiymətləndirirəm və düşünürəm ki, həmin xanımın bu dairədən namizədliyinin irəli sürülməsi bir az da bizə sataşmaq və zarafat mesajıdır. Yəqin ki qələbəmizi etiraf edirlər. Xanımı tanımıram. Bildiyim odur ki, Binəqədi rayonunda müəllimə işləyir. Ona da uğurlar arzu edirəm".

Qeyd edək ki, dünən YAP-ın parlament seçkilərində iştirak edəcək namizədlərinin siyahısı açıqlanıb. Maraq doğuran məqam ondan ibarətdir ki, hakim partiyanın Binəqədi 1-ci seçki dairəsindən namizədinin də adı Aysel Əlizadədir və bu məsələ sosial şəbəkələrdə müzakirələrə səbəb olub.

İntiqam VALEHOĞLU
Ölkə.Az