\"Üçüncü dünya müharibəsinin işartıları görünür\"
Rusiyanın Suriyaya 28 qırıcı-bombardmançı təyyarə göndərdiyi xəbəri təsdiqini tapıb.
Rusiyanın Suriyaya göndərdiyi qırıcı-bombardmançı təyyarələrin 12 ədədi Su-24, 12 ədədi Su-25, 4 ədədi isə "Flanker" tiplidir.
Bu arada ABŞ da səssiz qalmayıb. ABŞ Almaniya ərazisində 20 ədəd yeni tipli atom bombası yerləşdirməyə hazırlaşır. Bu bombaların hər birinin gücü Hirosimaya atılan bombadan 80 dəfə çoxdur.
Bəzi politoloqlar son proseslərdən sonra ABŞ və Rusiyanın toqquşmasının qaçınılmaz olduğunu deyirlər.
Baş verən prosesləri hərbi ekspert Üzeyir Cəfərov Ölkə.Az-a şərh edib:
"Rusiyanın Suriyadakı konfliktdə iştirakını rəsmi Moskva əvvəlcə gizlətməyə çalışsa da, faktlar ortaya qoyulandan sonra rusiyalı rəsmilər olanları təsdiq etdilər. Rusiya çox çətin iqtisadi durumda olmasına baxmayaraq yürütdüyü siyasətdən əl çəkmir. Bu qədər problemlərin fonunda Rusiyanın geri çəkiləcəyini və ya fərqli qərar verəcəyini düşünmək olardı. Ancaq təəssüflər olsun ki, Rusiya hələ də dünyada vəziyyətin gərginləşməsinə xidmət edən addımlar atır. Qırıcı-bombardmançı təyyarələrin Suriyada görünməsindən sonra Rusiya etiraf etdi ki, Suriyaya kömək edirik, orada sülh yaratmaq missiyasını yerinə yetiririk. Əslinə qalsa, Rusiya çökməkdə olan iqtisadiyyatını xilas etmək, pul əldə etmək və regionda olan nüfuzunu qorumaq üçün Suriyaya kömək edir. Son bir neçə ildə Rusiyanın tutduğu siyasət onun bir dövlət kimi iflasını yaxınlaşdırır. Dünya ictimaiyyəti artıq Rusiyaya inanmır.
ABŞ-ın Avropada bombalar yerləşdirməsi məsələsinə gəldikdə isə, rəsmi Vaşinqton hər şeyi görür. ABŞ Rusiya ilə münasibətləri korlamaq istəmir, ancaq görür ki, Rusiya istənilən halda təhlükə yarada bilər. Bombaların Avropaya yerləşdirilməsi müttəfiqlərinin təhlükəsizliyini təmin etmək üçündür. Bu hər hansısa bir ölkəyə qarşı yönəlməyib.
Son baş verən hadisələr soyuq müharibə deyil. Soyuq müharibə XX əsrdə qaldı. XXI əsrdə artıq 3-cü düna müharibəsinin işartıları görünür. Hal-hazırda həm psixoloji, həm informasiya müharibəsi, həm də ola bilsin gələcəkdə tərəflər arasında fiziki toqquşmalara gətirib çıxaracaq fəal hərbi hərəkətlilik müşahidə olunsun. Bu da böyük güclərin toqquşmasına gətirib çıxaracaq".
Qeyd edək ki, Rusiya Suriyaya hərbi təyyarələr göndərdiyi barədə çıxan xəbərləri təkzib etmişdi.
Səxavət Məmməd
Ölkə.Az
