Avropanın Azərbaycan əleyhinə istəklərini tutuquşu kimi təkrarlayırlar

“Avropanın regional mexanizmlərinə münasibətdə Azərbaycan həmişə vicdanlı davranıb. Biz hesab etmişik ki, əgər Avropa Şurası bəşəri haqları, yaxud Avropa İttifaqı əməkdaşlıq prinsipini təşviq edirsə, bu bizim Konstitusiyamızda təsbit olunmuş niyyət və məqsədlərlə üst-üstə düşür və ötən dövr ərzində də uğurlu əməkdaşlıq üçün bizdən asılı olan bütün addımlar atılıb. Amma Avropa təsisatları özlərinin selektiv yanaşmaları ilə gözləntiləri doğrultmur”.

Ölkə.Az xəbər verir ki, bunu deputat Bəhruz Məhərrəmli parlamentin plenar iclasında çıxışı zamanı deyib.

Onun sözlərinə görə, Azərbaycanın 20 faiz ərazisi Avropa Şurasının üzvü tərəfindən işğalda saxlanılıb, amma təsisatın məhz hüquq adına effektiv reaksiyasını görməmişik. “Avropa İttifaqının bir sıra üzvləri və Avroparlamentin timsalında təsisatları isə açıq formada erməni təcavüzü və separatizminə dəstək veriblər”, - o qeyd edib.

Deputat əlavə edib ki, Azərbaycan özünümüdafiə hüququnu həyata keçirib işğal və separatizmə son qoymaqla beynəlxalq hüququn aliliyini təmin edib: “Amma bizim BMT Nizamnaməsi ilə təsbit olunmuş haqlarımızı mübahisələndirməyə çalışır, ermənilərin qayıdış hüququndan bəhs edən saxtakar bəyanatlar tirajlayırlar.

Baxmayaraq ki, bizim hədəfimizdə erməni yox, işğal, separatizm və terror olub və ermənilər məhz Ermənistanın və havadarlarının təhriki ilə Qarabağdan köçüb. Onlarla ləyaqətlə davranılıb, rahat gedişləri təmin olunub və proses də vizual formada sənədləşdirilib. Xocalıdan, Kəlbəcərdən qovulan insanlar, Arazın buzlu suyuna tökülən zəngilanlılar Ermənistandan eyni münasibəti görmüşdümü?

Biz reinteqrasiya prosesində qərarlıyıq, tərəfimizdən ciddi addımlar atılır və kənar müdaxilələrə də lüzum görmürük.

İndi hansısa Avropa təsisatı bu məsələyə burununu soxmaqda israrlıdırsa o zaman öncə 300 mindən artıq qərbi azərbaycanlının Ermənistana ləyaqətli qayıdış hüququndan, 700 mindən artıq azərbaycanlının Qarabağ və Şərqi Zəngəzura qayıdışını ləngidən mina terroru, onların yerlə yeksan edilmiş evlərindən danışmağa başlasın.

Etmirlər, çünki sərf etmir. Onlar üçün maraqlı olan Azərbaycana təzyiq mühiti yaratmaqdır. Bu məqsədlə də “siyasi məhbus” və yeni uydurulmuş “inanclı məhbus” amillərini gündəm edirlər. Sual çıxır, bunlar müsəlmanın inancına bu qədər həssasdırsa, niyə hər addımbaşı Avropa küçələrində Qurani Şərif yandırılır?

Azərbaycanın radikal ünsürləri də Avropa, Fransa nə istəyir onu da tutuquşu kimi təkrarlayır. Adam öz dövlətinə bu qədər düşmən kəsilməz, insanın heysiyyəti olar.

Vətən müharibəsindən bu ünsürlər Qarabağ və Şərqi Zəngəzurun işğalda qalmasına ümid kimi baxırdılar. Necə ki, bu torpaqların işğalı üzərindən hakimiyyəti 90-cı illərdə zəbt etmişdilər, 2020-ci ilə qədər də işğal prosesinin davamlılığı onlar üçün iqtidar ümidi idi.

Antiterror tədbirlərinə qədər isə bu ünsürlərin öz aləmlərində əsas arqumenti “Xankəndi” idi.

Cənab İlham Əliyev isə ardıcıl Zəfərləri ilə Ermənistanı, onun havadarlarını, o cümlədən Xankəndi təlxəkləri kimi mənəvi və siyasi cəhətdən bitmiş bu ünsürləri də yerlə yeksan etdi”.

Mürtəza
Ölkə.Az