Ərazilərimizə 1 milyondan artıq mina basdırılıb – Sadiq Qurbanov

Ermənistanın mina terroru beynəlxalq hüquq normalarına ziddir və buna görə cavab verməli, əlaqədar beynəlxalq təşkilat və qurumlar da bizi dəstəkləməlidirlər.

Ölkə.Az xəbər verir ki, bu fikirləri Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov noyabrın 4-də Milli Məclisdə “Mina təhlükəsi ilə mübarizə - partlayıcı sursatların ekosistemə təsiri” mövzusunda keçirilən ictimai dinləmədə deyib.

44 günlük Vətən müharibəsindən sonra Azərbaycanın ən böyük problemi mina təhlükəsidir. Bu da səbəbsiz deyil ki, Prezident İlham Əliyev BMT-nin Dayanıqlı İnkişaf Məqsədlərini əhatə edən prinsiplər sırasına mina təhlükəsinin də əlavə edilməsini təklif edib.  

Komitə sədri hazırda Qoşulmama Hərəkatında mina təsirinə məruz qalmış ölkələrin həmfikir qrupunun yaradılması istiqamətindən intensiv iş aparıldığını deyib:

“Ermənistan işğal dövründə Azərbaycan ərazilərinə 1 milyondan artıq mina basdırıb. Mülki insanlarımız bu təhlükədən həyatını itiriblər. Onların arasında uşaqlar da var”. 

Komitə sədri vurğulayıb ki, Azərbaycan sülh və ərazilərində təhlükəsizlik istəyir: “Təəssüf ki, ölkəmizin sülh çağırşlarına hələ də cavab yoxdur”. 

Mürtəza
Ölkə.Az