Cəbhədə vəziyyətin gərginləşməsinə səbəb nədir?

"Bunlar Ermənistanın təxribatıdır və ciddi proseslərin başlanğıcıdır. Vəziyyət getdikcə gərginləşir, itkilərimiz çoxalır. Elə qarşı tərəf də ciddi itkilər verir. Amma bizimçün hər əsgər qiymətlidir və böyük itkidir. Bu gün çıxılmaz vəziyyətdə qalan Ermənistanın vəziyyəti gərginləşdirərək bu gərginlikdən siyasi məqsədləri üçün istifadə etməkdən başqa çarəsi qalmayıb".

Bu fikirləri Ölkə.Az-a açıqlamasında ehtiyatda olan polkovnik-leytenant, hərbi jurnalist İbrahim Rüstəmli son günlər cəbhə xəttində atəşkəsin tez-tez pozulmasının səbəblərini şərh edərkən səsləndirib. İ.Rüstəmli bildirib ki, Ermənistan artıq Rusiyadan da üz döndərməkdədir:

"Fikir verirsinizsə, Ermənistan artıq Rusiyaya da arxasını çevirib. Ermənistanın müdafiə nazirinin müavini, bir sıra siyası fiqurları Amerikaya tez-tez rəsmi səfərlərə gedirlər, bu ölkədən dəstək istəyirlər. Erməni mediasını izləyirəm. Orada vəziyyət belə şərh olunur ki, ölkə nə Qafqaz, nə Qərb, nə də Avropada mövqeyini qoruya bilmir və siyasi cəhətdən iflasa uğrayıb. Cəbhədə vəziyyətin gərginləşməsi Ermənistan üçün siyasi əhəmiyyət daşıyır. Rəsmi İrəvan yenə də əhalinin diqqətini Qarabağa yönəltmək niyyətindədir. Çünki Sarkisyan hakimiyyətinin özü də siyasi iflasa uğrayıb. Burada vəziyyət son dərəcə gərgindir. Kütləvi xarakter almış mitinqləri xatırlayın. O mitinqlər hələ də səngiməyib. Ona görə rəhbərlik hər vəchlə əhalinin diqqətini Qarabağa yönəldir. Hər zaman da Qarabağ bir vasitə kimi istifadə edirlər. Sadə erməni vətəndaş üçün Qarabağın heç bir mənəvi əhəmiyyəti yoxdur. Çünki sadə erməni vətəndaşı bu gün bir tikə çörək və su uğrunda mübarizə aparır. Bu sosial durumda olan insanın Qarabağ haqda düşünməyə imkanı ola bilməz".

İntiqam VALEHOĞLU
Ölkə.az