Narazılıq getdikcə azalmaqdadır, onlara əlillik dərəcəsi verilib - Nazir
“Cari ildə 41 min şəxsə əlillik dərəcəsi verilib. Bunların yarısı yeni, yarısı isə təkrar müraciət edənlərdir”.
Ölkə.Az xəbər verir ki, bunu Milli Məclisin Əmək və sosial siyasət komitəsinin bu gün keçirilən iclasında əmək və əhalinin sosial müdafiəsi naziri Sahil Babayev deyib.
Nazirin sözlərinə görə, əlilliklə bağlı kriteriyaların sayı 128-dən 617-yə çıxardıqdan sonra əlilliyin müəyyənləşdirilməsində yüngüləşmə yaranıb.
“Biz komissiyaları gündəlik həyata keçiririk və komissiyada şəffaf şəkildə QHT və İctimai Şuranın nümayənədlərinin iştirakı ilə həyata keçiririk. Elə insan var, 4-5 dəfə komissiyadan keçib. Lakin yenə də razılaşmaq istəmir və biz onun hüququnu tanıyırıq. Narazılıq getdikcə azalmaqdadır. Narazı olan şəxsi hər dəfə müraciət etdikcə komissiyadan keçiririk”, - nazir deyib.
O əlavə edib ki, İkinci Qarabağ müharibəsindən sonra 6300 şəxsə şəhadətlənmə, yəni yüngül xəsarətə görə birdəfəlik yardım verilib: “Amma əlilliklə bağlı kriteriya sayı artırıldıqdan sonra onların 4 mindən çoxu əlillik dərəcəsi alıb. Ümumiyyətlə, 43 faiz müharibə iştirakçısı psixi xəstəliyə görə əlillik dərəcəsi alanlardır”.
Mürtəza
Ölkə.Az