"Rusiya Suriya əməliyyatlarında haqlıdır"

Yeddi ölkə Rusiyaya Suriyada başlatdığı hərbi əməliyyatlara görə müraciət edib

Fransa, Almaniya, Qətər, Səudiyyə Ərəbistanı, Türkiyə, Böyük Britaniya və ABŞ müraciətlərində Rusiyanın Suriyada müxalifətə qarşı yox ancaq İŞİD-ə qarşı əməliyyat keçirməyə çağırıb.

Baş verən prosesləri politoloq Zərdüşt Əlizadə Ölkə.Az-a şərh edib:

"Suriya müstəqil dövlətdir və BMT-nin üzvüdür. BMT-nin üzvü olan ölkələrin ərazisinə təcavüz yolverilməzdir. Yalnız BMT Təhlükəsizlik şurasının qərarı ilə əməliyyatlar keçirilə bilər. Bu qərar olmadan Qərb dövlətləri Suriya ərazisini bombalayırlar. Arqumentləri də budur ki, Suriya ərazisində İŞİD fəaliyyət göstərir. Suriyanın hal-hazırda dövlət başçısı Rusiyadan yardım istəyib. Bu da qanunidir. Rusiya Bəşər Əsədə kömək etmək üçün və İŞİD-ə qarşı qanuni əməliyyatlar həyata keçirir. Rusiya həm Azad Suriya Ordusunu, həm də İŞİD-i bombalayır. Rusiyanın Azad Suriya Ordusunu bombalaması ABŞ-ın xoşuna gəlmir. Ona görə də, qanunsuz hərəkət edən yeddi dövlət toplaşıb Rusiyadan xahiş edirlər ki, Azad Suriya Ordusunu bombalama. Rusiyanın real hərbi gücü Qərbin real hərbi gücündən xeyli zəifdir, ancaq Rusiyanın qətiyyəti var. Rusiya bu məsələdə haqlıdır. Rusiyaya qısa müddətə nə isə etmək mümkün deyil. Ona görə də, uzunmüddətli iş aparırlar, iqtisadi sanksiyalarla zəiflətmək istəyirlər".

Qeyd edək ki, Rusiya Suriyada həm müxalifəti, həm də İŞİD-i bombalayır.

Səxavət Məmməd
Ölkə.Az