Əsirlərin dəyişdirilməsi həyata keçirildi - FOTO/VİDEO(YENİLƏNİB)
Azərbaycan-Ermənistan sərhədinin Qazax rayonundan keçən hissəsində 13 dekabr 2023-cü il tarixində hərbi qulluqçuların qarşılıqlı şəkildə təhvil verilməsi həyata keçirilib.
"Ölkə.az" Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasına istinadən xəbər verir ki, Təhvilvermə prosesində hər hansı insident baş verməyib.
Azərbaycan tərəfində saxlanılan erməni hərbçilərinin Beynəlxalq Qızıl Xaç Komitəsi tərəfindən sağlamlıq durumları yoxlanılaraq qənaətbəxş hesab edildikdən sonra müvafiq razılaşmaya əsasən təhvil veriliblər.
Qeyd edək ki, 7 dekabr 2023-cü il tarixində Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatı arasında aparılmış danışıqların nəticəsində humanizm prinsipləri rəhbər tutularaq və qarşılıqlı etimad tədbiri kimi Azərbaycan tərəfindən 32 erməni hərbçinin, Ermənistan tərəfindən 2 azərbaycanlı hərbçinin azad edilməsi barədə razılıq əldə olunmuşdur.
***
Azərbaycan-Ermənistan razılaşmasına əsasən əsir mübadiləsinə başlanılıb.
Ölkə.az xəbər verir ki, teleqram kanallarında əsirlərin dəyişdiriləcəyi Qazax-İcevan sərhədi yaxınlığından fotolar da paylaşılıb.
Ermənistanın xarici işlər naziri Mirzoyan bu gün hərbi əsirlərin mübadiləsinin aparılacağını təsdiqləyib. “Bizim Azərbaycan tərəfinin razılaşmalara əməl etməyəcəyini söyləməyə əsasımız yoxdur”, - deyə erməni diplomat qeyd edib.
Ermənistan Milli Assambleyasının spikeri Alen Simonyan deyib ki, o, məhbusların qayıtmasını gözləyir.
Xatırladaq ki, Simonyan 2021-ci ildə "Mənim üçün məhbuslar yoxdur, onlar fərarilərdir" açıqlaması ilə gündəmə gəlmişdi.
Həmin fotoları təqdim edirik:
