Ermənistan və Azərbaycan sərhədçiləri sıx əməkdaşlıq edəcək - Paşinyan şərh etdi

Sərhəd sülhün əlamətidir və bu o demək olacaq ki, Ermənistan və Azərbaycan sərhədçiləri bir-biri ilə əməkdaşlıq edərək sərhədi müstəqil şəkildə qoruya biləcəklər.

Ölkə.Az xəbər verir ki, bunu Ermənistanın baş naziri Nikol Paşinyan Ermənistanla Azərbaycan arasında 4 kəndin qaytarılması ilə bağlı əldə olunmuş razılaşmanı şərh edərkən deyib.

Onun sözlərinə görə, bu gün beynəlxalq səviyyədə Ermənistan və onun suverenliyi haqqında təsəvvürlərdə artıq ciddi dəyişiklik baş verib. 

"Diqqət etmisinizsə, dünən G7 ölkələri bir bəyanat verdilər ki, onlar mahiyyət etibarilə indi həyata keçirməyə çalışdığımız prinsipi dəstəklədilər", - o bildirib.

Tavuşda Rusiya postlarının olmasına toxunan Paşinyan söyləyib: “Orada vəziyyətlə bağlı rus postları var. Hazırda baş verənlər situasiyada əhəmiyyətli dəyişiklikdir və bu, bütün istiqamətlərdə öz təsirini göstərməlidir. Bu o deməkdir ki, bizim cəbhə xəttimiz yoxdur, sərhədimiz var".

Mürtəza
Ölkə.Az