"Müsavatın bu qərarı heç cür başa düşülən deyil"

Müsavat partiyası seçkilərdən çəkildiyini elan etdi.

Bu gün Müsavat partiyasının qərargahında partiya Divanının toplantısı keçirilib. Toplantıda qərara alınıb ki, partiya seçkilərdən imtina etsin.

Müsavat Divanının aldığı digər qərar isə parlament seçkilərinin təxirə salınaraq 4 ay sonraya təyin edilməsi olub.

Müsavat partiyasının aldığı bu qərarı politoloq Qabil Hüseynli Ölkə.Az-a şərh edib:

"Seçkilərə qatılmağı hər kəsdən çox təbliğ edən Müsavat partiyası idi. Boykot taktikasının heç bir nəticə verməyəcəyini də Müsavat partiyası demişdi. İddia edirdilər ki, seçiciləri fəallaşdırmaq, əhalini siyasi cəhətdən fəallaşdırmaq üçün mütləq seçkilərdə iştirak etmək lazımdır. Müsavat partiyasının bu yanaşması düzgün yanaşma idi. Ona görə ki, siyasi partiyanın işi seçkilərdə iştirak etmək, əhali ilə işləmək, seçkiqabağı təbliğat-təşviqat kampaniyasının verdiyi üstünlüklərdən yararlanıb ictimai şüuru, ictimi rəyi öz xeyirlərinə dəyişdirməkdir. Məsələlərə bu aspektdən yanaşaraq onlar seçkilərə getdilər. Seçkiləri boykot edənlər isə onları qınadılar.

Seçkilərin bu mərhələsində seçkiləri baykot etmək başa düşülən deyil. Ən azından seçkilərin axırına kimi iştirak edib, seçki haqqında səriştəli bir söz söyləyə bilərdilər. Onlar müşahidəçilərini seçki məntəqələrində yerləşdirməli, seçki prosesi haqqında tam və bitkin məlumat əldə etmək üçün seçki prosesində axıra qədər iştirak etməli idilər.

Sabah Müsavat partiyası seçkilərlə bağlı müxtəlif iradlar irəli sürəcək. O iradları əsaslandırmaq üçün seçkiyə getmək lazım idi. Bu yanaşma düzgün yanaşma deyil".

Seçkinin 4 ay sonra keçirilməli olması tələbinə gəldikdə isə politoloq bildirdi ki, "bu artıq cığallıqdır. 4 ay sonra nə partiyanın imkanları artası deyil, nə də ki, hakimiyyətdə zəifləmə olası deyil. Bu sadəcə olaraq arqumentsizlikdən irəli gələn və eyni zamanda cığallıq əlamətidir. 4 ay sonra seçkinin keçirilməsi tələbi hakimiyyətə təzyiq etmək məqsədi daşıyır. Bununla həm də öz elektoratı qarşısında bu arqumentdən istifadə edib üzvlərə və fəallara izahat verməyə çalışacaqlar".

Qeyd edək ki, Müsavat partiyasının 25 namizədi qeydə alınmışdı.

Səxavət Məmməd
Ölkə.Az