“Futbolu bataqlıqdan çıxardı, amma dayısı oğlunu kanaldan çıxara bilmədi”
“Ağdaş” klubunun rəhbəri Rəhman Əliyevin ölümündən sonra ona yaxın olan şəxslər xatirələrini bölüşüblər.
Ölkə.Az xəbər verir ki, idman jurnalisti Həsən Quluzadə R.Əliyevin həm rəhbər, həm də fəhlə olduğunu bildirib:
"Ağdaş" bu ilin aprelin 30-da evdə "Qusar"ı qəbul edəcəkdi. Stadion oyuna hazırlanırdı. Otu biçən komandanın rəhbəri Rəhman Əliyevdir. Sabah da meydançanı xətləyəcəkdi.
Sonra qapı torunu asacaq, ertəsi gün isə rayonda afişa vuracaqdı. Dəstəksiz, köməksiz tək başına komanda saxlayırdı. Hələ aşağı yaş qruplarında da komandaları var idi. Onunla da məşğul olurdu. Şəxsən özü yetişdirirdi uşaqları.
Həm rəhbər idi, həm fəhlə. Bir manat da xeyri yox idi. Mövsüm boyu çəkdiyi əziyyətlər yazılsaydı, bir kitab olardı. Sadəcə futbol fədaisi idi.
Heyif ki, belə bir futbol rəhbərini, futbol azarkeşin itirdik. Allah rəhmət eləsin”.
Digər bir idman jurnalisti Səbuhi Musa da R.Əliyevin mübarizliyindən söz açıb:
“Rəhmanı 5-6 il olardı tanıyırdım. "Ağdaş"ı necə yaratması, onun üçün hansı əziyyətlərdən keçməsi bugünədək yadımdadır. Ağdaşda həmkarların qalması üçün etdiyi canfəşanlıq, Ağdaş Olimpiya İdman Kompleksində onlara yer etməsi...
Oturub söhbət edəndə adamın "Ağdaş"la bağlı necə böyük planları olduğunu görürdüm. Di gəl ki maliyyə ucbatından onları yerinə yetirə bilmirdi. Adam necə işgüzar idisə, Aslan Şahgəldiyev (Peşəkar Futbol Liqasının vitse-prezidenti-red.) mətbuat konfransında bir tək onu digərlərinə örnək olaraq göstərmişdi. Yaxşı ki, ölümündən qabaq sevimli "Ağdaş"ı II Liqada olsa da, mübarizə apardı. Amma arzuları yarımçıq qaldı..
"Ağdaş"da yenə futbol olacaq. Ən azından ona görə olmalıdır. Ancaq o top, o qazon, o meydança Rəhmansız bir başqa cür olacaq. Ağdaş futbolu onurğa sütununu - rəhbərini, menecerini, inzibatçısını, topdaşıyanını, həkimini itirdi. Ağdaş futbolunu bataqlıqdan çıxarmağı bacarmışdı, amma dayısı oğlunu kanaldan çıxarmağı bacara bilmədi. Su kimi duru, saf adamı elə su əlimizdən aldı”, - deyə o əlavə edib.
Qeyd edək ki, Azərbaycan II liqa təmsilçilərindən “Ağdaş” klubunun rəhbəri Rəhman Əliyev Ağdaş rayonunda su kanalında bataraq ölüb.
Belə ki, R.Əliyev çayda boğulan dayısı oğlu Fərid Ağazadəni xilas etmək istəyərkən həyatını itirib.
F.Ağazadə ailəli olub, 3 qız övladı var. Rəhman Əliyev isə subay olub.
Billurə
