Tokayevdən MDB məkanı üçün TƏKLİF
MDB Dövlət Başçıları Şurasının iclasında Qazaxıstan Prezidenti Kasım-Jomart Tokayev Birlik ölkələrində dövlətlərarası “Birlik yarmarkası” proqramının işə salınmasını və hər il ticarət tədbirlərinin keçirilməsini təklif edib.
“Ölkə.az” xəbər verir ki, bu barədə Qazaxıstan dövlət başçısının mətbuat xidmətinin bəyanatında deyilir.
“Bu gün yarmarka ticarətinə tələbat getdikcə artır. Təklif edirəm ki, “Birlik yarmarkası” dövlətlərarası proqramı işə salınsın. Proqram çərçivəsində hər il MDB ölkələrinin müxtəlif şəhərlərində bütün Avrasiya regionundan sənətkarların və fermerlərin dəvət olunması ilə ticarət tədbirləri keçirilsin”, - Tokayev bildirib.
O qeyd edib ki, Qazaxıstan ilk belə yarmarkanı ölkənin ən qədim şəhərlərindən birində - vaxtilə Böyük İpək Yolunun mühüm qovşağı olan və qədim zamanlardan “tacirlər şəhəri” adlandırılan Tarazda keçirməyə hazırdır.
“Əminəm ki, 2023-cü ildə qəbul edilmiş “Xidmətlərin və İnvestisiyaların Azad Ticarəti haqqında” Saziş ticari-iqtisadi əlaqələrimizin dərinləşməsinə hər cür töhfə verəcək. Eyni zamanda sənaye kooperasiyası, gömrük tənzimlənməsinin sadələşdirilməsi, yeni tədarük zəncirlərinin formalaşdırılması və rəqəmsal texnologiyaların tətbiqi məsələlərində qarşılıqlı əlaqənin gücləndirilməsi istiqamətində işlərin davam etdirilməsi vacibdir”, - Qazaxıstan lideri vurğulayıb.
