Yerindən oynatdığımız "daşlar" yenə də erməniləri əzəcək - AÇIQLAMA

"Biz zaman-zaman mötəbər tədbirlər ərəfəsində anti-Azərbaycan qüvvələrin aktivləşərək Azərbaycana qarşı çirkin kampaniyalar həyata keçirdiyinin çox şahidi olmuşuq. Azərbaycanın noyabr ayında ümumbəşəri problemlərdən biri hesab edilən iqlim dəyişikliyinə qarşı mübarizə çərçivəsində BMT-nin İqlim Dəyişmələri üzrə Çərçivə Konvensiyasının Tərəf Dövlətlərinin 29-cu görüşünə (COP29) Azərbaycanın ev sahibliyi etdiyi bir zamanda təkrarlandığının şahidi olmaqdayıq. Azərbaycan tərəfinin COP29-a yüksək səviyyədə davam edən hazırlığı, bütövlükdə, bəşəriyyəti narahat edən iqlim dəyişmələri üzrə fundamental məsələlərin həllinə ciddi töhfə verəcəyini görən anti-Azərbaycan qüvvələr, erməni lobbisinin təsiri altında olan dairələr ölkəmizə qarşı çirkin və məkrli oyunlara əl atıblar. Təəssüflə qeyd etmək lazımdır ki, ABŞ Senatının və Nümayəndələr Palatasının bir qrup üzvünün dövlət katibi Entoni Blinkenə göndərdiyi müraciəti də bu qəbildəndir. Bu yolla hansısa planlaırnı reallaşdırmaq istəyirlər".

Bunu Ölkə.Az-a açıqlamasında deputat Müşfiq Məmmədli deyib.

Onun sözlərinə görə, bu onu göstərir ki, Ermənistanın havadarları hələ də Azərbaycanın əldə etdiyi qələbəni həzm edə bilmirlər. "Cənab Prezident çıxışlarının birində belə bir ifadə işlədib: "Biz İkinci Qarabağ müharibəsi və antiterror əməliyyatı zamanı sarsılmaz hesab olunan elə bir daşları tərpətdik ki, bunu bizə bağışlamayacaqlar, biz bunu bilməliyik. Əgər kimsə hesab edir ki, bizdən əl çəkəcəklər, səhv edir. Biz hazır olmalıyıq, səfərbər olmalıyıq". Bəli, fürsət yaranan kimi yerindən oynayan "daşlar" Azərbaycanın uğurlarına, qələblərinə kölgə salmaq üçün ölkəmizə qarşı irqi ayrı-seçkiliyi ehtiva edən, böhtanla dolu, beynəlxalq hüquqa zidd əməllərə əl ataraq təzyiq kampaniyasını həyata keçirməyə cəhd edirlər. Amma unudurlar ki, artıq bu metodlardan istifadə etməklə Azərbaycana təzyiq edib hansısa məsələni diktə etmək yersiz və qeyri-mümkündür. Amerikalı konqresmenlərinin bu hərəkəti əslində ikitərəfli münasibətlərə ciddi xələl gətirir", - o qeyd edib.

Deputat əlavə edib ki, erməni lobbisinin təsiri altında olan amerikalı konqresmenlərin Azərbaycan qarşı bu cür həqiqətdən uzaq, iftira dolu əməlləri ilk deyil və biz zaman-zaman bunun şahidi olmuşuq: "Hələ ötən əsrin 80-ci illərinin sonunda erməni lobbisinin təsir dairəsində olan amerikalı konqresmenlər SSRİ rəhbərliyinə müraciət edərək Azərbaycana qarşı ciddi tədbirlər görməyə çağırmışdılar. ABŞ 90-cı illərin əvvəlində Ermənistanın torpaqlarımızda genişmiqyaslı işğalçılıq siyasəti həyata keçirən zaman Azərbaycana qarşı qadağalar nəzərdə tutuan "907-ci düzəliş" adlı sənəd qəbul edib. Ümumiyyətlə başda ABŞ olmaqla Qərb demokratiya, insan haqlarını əlində bayraq edib öz maraqlarının dünyanın müxtəlif bölgələrində zorla həyata keçirməyə cəhd etməkdədir. 

Əgər Azərbaycan dövlətçiliyinin ən zəif dövrlərində belə ağır təzyiqlərə müqavimət göstərib milli maraqlarını sonadək müdafiə edə bilibsə, ölkəmizin indiki güclü və qüdrətli, dünya miqyasında böyük nüfuza malik olub qlobal proseslərdə ciddi aktor rolunda çıxış etdiyi bir zamanda bu cür təzyiqlərlə nəyisə etmək mümkünsüzdür. ABŞ-nin bu təhdid və təzyiq siyasəti də cənab Prezidentin yürütdüyü cəsarətli, uzaqgörən diplomatiyası nəticədə iflasa uğrayacaq. 

Azərbaycan ABŞ-nin ölkəmizə qarşı beynəlxalq hüquqa zidd hərəkətlərinə qarşı adekvat addıma atmaq gücünə qadirdir və bunun mütləq hansısa formada cavabı olacaq. Digər tərəfdən isə ABŞ-nin başucalığı gətirməyən beynəlxalq hüququ ayaqlar altına atmasından uduzan tərəf dəstəklədikləri Ermənistan olacaq. Bu, bölgədə sülhə deyil gərginliyə xidmət edəcək ki, bunun də bədəlini Ermənistan və erməni xalqı ödəməli olacaq.

Azərbaycan cəmiyyəti olaraq biz cənab Prezidentin bəyan etdiyi kimi, əldə etdiyimiz qələbələrlə tərpətdiyimiz daşların bizə qarşı olan hərəkətlərinə hazır və səfərbər olmalıyıq. Oynayan "daşların" vurduğu zərbə yenə də erməniləri əzsin və buna da şübhə olmasın. Əminəm və inanıram ki, bu belə də olacaq. Ona görə də biz cəmiyyət olaraq  cənab Prezident ətrafında birliyimizi, həmrəyliyimizi qoruyub saxlamalı, yeni-yeni uğurlarımıza imza atmalıyıq və cənab İlham Əliyevin liderliyi altında mütləq qələbələrə imza atacağıq".

Mürtəza
Ölkə.Az