Qafqazın gələcəyini müəyyən edən səfər
Bunu Ölkə.az-a açıqlamasında Milli Məclisin deputatı İlham Məmədov deyib.
O bildirib ki, Azərbaycan və Gürcüstan xalqları arasında əsrlər boyu mövcud olmuş dostluq, qonşuluq və qarşılıqlı etimad münasibətləri bu gün dövlətlərarası əlaqələrin ən möhkəm dayağına çevrilib: “Prezident İlham Əliyevin vurğuladığı kimi, bu tarixi bağlılığın məntiqi nəticəsi olaraq iki ölkə arasında strateji tərəfdaşlıq modeli formalaşıb və bu model hazırda region üçün nümunə xarakteri daşıyır.
Səfərin ən mühüm siyasi-iqtisadi xəttini şübhəsiz ki, Orta Dəhliz və nəqliyyat-kommunikasiya xətlərinin genişləndirilməsi təşkil edir. Azərbaycan Prezidentinin “Orta Dəhliz Azərbaycan və Gürcüstan ərazisindən keçir və bu, bizim üçün əsas nəqliyyat damarıdır” mesajı, əslində, regionun yeni geoiqtisadi reallığını ifadə edir.
Bu gün Çin–Mərkəzi Asiya–Xəzər–Azərbaycan–Gürcüstan–Türkiyə–Avropa marşrutu üzrə yük axınının sürətlə artması Bakı və Tbilisinin strateji əhəmiyyətini daha da yüksəldir. Qlobal ticarət yollarında baş verən dəyişikliklər fonunda Azərbaycan və Gürcüstan artıq sadəcə tranzit ölkələr deyil, Avrasiyanın əsas logistika və enerji körpüsü rolunda çıxış edir.
Məhz buna görə Prezident İlham Əliyevin Gürcüstan səfəri yalnız diplomatik protokol xarakteri daşımır, həm də yeni investisiya, logistika və enerji qərarlarının siyasi zəminini möhkəmləndirən addımdır”, - o vurğulayıb.
Deputat əlavə edib ki, Azərbaycan–Gürcüstan tərəfdaşlığının digər əsas istiqaməti enerji təhlükəsizliyidir: “Bakıdan başlayaraq Gürcüstan üzərindən Türkiyə və Avropaya uzanan strateji boru kəmərləri, xüsusilə Cənub Qaz Dəhlizi Avropanın enerji təhlükəsizliyində mühüm rol oynayır.
Müasir beynəlxalq şəraitdə enerji resurslarının siyasi alətə çevrildiyi bir dövrdə Bakı–Tbilisi xətti Qərb üçün etibarlı enerji alternativi kimi daha da aktuallaşır. Bu baxımdan səfər zamanı enerji gündəliyinin ön planda olması tamamilə təbiidir”.
Deputat qeyd edib ki, Prezident İlham Əliyevin səfər çərçivəsində səsləndirdiyi ən mühüm siyasi tezislərdən biri də Cənubi Qafqazın münaqişə məkanından əməkdaşlıq məkanına çevrilməsi ilə bağlıdır:
“Uzun illər müharibə, separatizm və geosiyasi qarşıdurmalarla xarakterizə olunan region bu gün yeni mərhələyə qədəm qoyur. Azərbaycan 2020-ci ildən sonra yaratdığı yeni reallıqla sülh gündəliyini önə çıxarıb və indi Gürcüstanla birlikdə regionda sabitliyin institusional əsaslarını gücləndirir.
Bu səfər göstərir ki, Bakı və Tbilisi regionda sülhün möhkəmlənməsi, sərhədlərin toxunulmazlığı, dövlət suverenliyi və əməkdaşlıq prinsiplərinin qorunması məsələsində ortaq mövqedən çıxış edir. Ən əsası isə bu səfər Cənubi Qafqazın yeni dövrdə müharibə yox, əməkdaşlıq, sabitlik və ortaq rifah məkanı kimi formalaşmasının siyasi manifestidir”.
Mürtəza
