Paşinyan: Azərbaycanla sərhəddəki istehkamlar sərhəd qoşunlarına təhvil veriləcək
Ölkə.Az erməni mediasına istinadən xəbər verir ki, bu barədə Ermənistanın Baş naziri Nikol Paşinyan Milli Təhlükəsizlik Xidmətinin Sərhəd Qoşunlarının yaradılması münasibətilə keçirilən təntənəli tədbirdə çıxışı zamanı bildirib.
Paşinyan qeyd edib ki, Ermənistan və Azərbaycan arasında sərhədlərin delimitasiyası yaxın vaxtlarda davam etdiriləcək və proses məntiqi müddət ərzində başa çatacaq.
"Biz sərhədlərin delimitasiyası və demarkasiyası haqqında danışarkən, hərbi qulluqçuların öz xidmətlərini daimi dislokasiya yerlərində yerinə yetirmələrini istəyirik. Onlar onilliklər ərzində məlum şərtlər səbəbindən heç də yaxşı olmayan səngərlərdə və mövqelərdə xidmət edirlər", — deyə o əlavə edib.
Baş nazirin sözlərinə görə, Azərbaycanla sərhəddəki güclü istehkamlar və müdafiə qurğuları müəyyən bir məqamda sərhəd qoşunlarına təhvil veriləcək:
"Bu, tam sülh şəraitində baş verəcək. Ermənistan hər gün bu istiqamətdə daha inamla irəliləyir. Ordu hissələrinin deyil, sərhədçilərin dayandığı yerdə təhlükəsizliyə inam daha yüksəkdir. Məhz belə bir əminlik yarandıqda, dövlət sərhədin bu və ya digər hissəsini sərhədçilərə təhvil vermək qərarına gəlir", — deyə Paşinyan bəyan edib.
