Qurtuluşdan şanlı qələbəyə: Azərbaycanın uğur formulunun strateji əsasları
“Azərbaycanın müasir dövlətçilik tarixində 15 İyun – Milli Qurtuluş Günü təkcə siyasi hakimiyyət dəyişikliyi ilə xarakterizə olunan tarix deyil. Bu gün əslində dövlətçiliyin dağılmaq təhlükəsindən xilas edilməsi, milli inkişaf modelinin müəyyənləşdirilməsi və gələcək uğurların strateji təməlinin qoyulması baxımından xüsusi əhəmiyyət daşıyır. Bu gün əldə olunan hər bir uğurun, o cümlədən Qarabağ Zəfərinin və tam suverenliyin bərpasının kökləri məhz 1993-cü ildə qəbul edilmiş taleyüklü qərarlara söykənir”.
Bunu Ölkə.az-a açıqlamasında deputat Asif Əsgərov deyib.
Onun sözlərinə görə, 1990-cı illərin əvvəllərində Azərbaycan mürəkkəb geosiyasi və daxili siyasi böhranla üz-üzə qalmışdı. “Ermənistanın hərbi təcavüzü nəticəsində torpaqların işğalı, hakimiyyət uğrunda mübarizə, iqtisadi tənəzzül və dövlət institutlarının zəifləməsi ölkəni faktiki olaraq parçalanma təhlükəsi ilə qarşı-qarşıya qoymuşdu. Belə bir şəraitdə Heydər Əliyevin hakimiyyətə qayıdışı sadəcə siyasi hadisə deyil, dövlətçilik institutlarının bərpası və milli təhlükəsizliyin təmin olunması baxımından strateji dönüş nöqtəsi oldu”, - o qeyd edib.
O əlavə edib ki, Milli Qurtuluşun əsas nəticəsi ölkədə sabitliyin təmin edilməsi idi: “Çünki sabitlik olmadan nə iqtisadi inkişaf, nə güclü dövlət quruculuğu, nə də müasir ordu yaratmaq mümkün deyildi. Məhz 1993-cü ildən sonra həyata keçirilən siyasət dövlət idarəçiliyində vahid mərkəzin formalaşmasına, qanunun aliliyinin təmin olunmasına və ölkənin gələcək inkişaf strategiyasının müəyyən edilməsinə imkan yaratdı.
Bu mərhələdə qəbul edilən ən mühüm qərarlardan biri Azərbaycanın enerji strategiyasının formalaşdırılması oldu. 1994-cü ildə imzalanan "Əsrin müqaviləsi" təkcə iqtisadi layihə deyildi. Bu saziş Azərbaycanın beynəlxalq münasibətlər sistemində mövqelərini gücləndirdi, ölkəyə milyardlarla dollar investisiya cəlb etdi və gələcək iqtisadi müstəqilliyin əsaslarını yaratdı. Sonrakı illərdə əldə edilən maliyyə resursları infrastrukturun yenilənməsinə, sosial proqramların həyata keçirilməsinə və ən vacibi güclü ordu quruculuğuna yönəldildi.
Əslində 2020-ci ildə qazanılan Vətən müharibəsi Zəfərini yalnız 44 günlük hərbi əməliyyatların nəticəsi kimi qiymətləndirmək düzgün olmazdı. Bu qələbə uzun illər ərzində aparılan siyasi, iqtisadi, diplomatik və hərbi hazırlığın məntiqi yekunu idi. Güclü iqtisadiyyat, müasir silahlı qüvvələr, milli birlik və müstəqil xarici siyasət kursu Azərbaycanın hərbi üstünlüyünü təmin edən əsas amillər oldu.
Prezident İlham Əliyevin rəhbərliyi ilə həyata keçirilən siyasət nəticəsində Ulu Öndərin müəyyən etdiyi inkişaf strategiyası yeni mərhələyə qədəm qoydu. Azərbaycanın beynəlxalq nüfuzu artdı, enerji və nəqliyyat layihələri ölkəni regionun əsas geosiyasi aktorlarından birinə çevirdi. Nəticədə ölkə təkcə iqtisadi və siyasi deyil, həm də hərbi baxımdan regionun aparıcı güc mərkəzi statusunu qazandı.
2023-cü ilin sentyabrında həyata keçirilən lokal antiterror tədbirləri isə Azərbaycanın dövlət suverenliyinin tam bərpasını təmin etdi. Bununla da 1993-cü ildə başlanmış dövlətçilik missiyası yeni tarixi mərhələyə keçdi. Bu gün Qarabağ və Şərqi Zəngəzurda aparılan genişmiqyaslı quruculuq işləri, Böyük Qayıdış Proqramının icrası və azad olunmuş ərazilərin iqtisadi dövriyyəyə inteqrasiyası həmin siyasətin real nəticələri kimi çıxış edir.
Müasir Azərbaycanın inkişaf təcrübəsi göstərir ki, dövlətin gücü ilk növbədə siyasi sabitliyə, güclü idarəetməyə, milli həmrəyliyə və uzunmüddətli strateji baxışa əsaslanır. Milli Qurtuluş Günü məhz bu prinsiplərin təntənəsi kimi tariximizdə xüsusi yer tutur. 15 İyun təkcə keçmişin xatirəsi deyil, həm də Azərbaycanın gələcək inkişaf yolunun fəlsəfəsini müəyyən edən tarixi hadisədir.
Bu gün Milli Qurtuluşdan başlayan yol Azərbaycanın tarixi Zəfərinə, tam suverenliyinə və regionun aparıcı dövlətlərindən birinə çevrilməsinə gətirib çıxarıb. Bu baxımdan Milli Qurtuluş Günü müasir Azərbaycan dövlətinin uğur formulunun başlanğıc nöqtəsi kimi qiymətləndirilə bilər”.
Mürtəza
