Komitə sədrindən təklif: Büdcənin icrasında "Yaşıl Büdcə" prioritet olmalıdır
"Rəqəmlər hər zaman dəyişə bilər, iqtisadi göstəricilər qlobal bazarlardan asılı olaraq dalğalana bilər, lakin dəyişməz qalan bir reallıq var: Azərbaycanın iqtisadi siyasətinin fəlsəfəsi dayanıqlılıq, daxili resursların diversifikasiyası və gələcək nəsillərin rifahı üzərində qurulub.
Mən bu gün çıxışımda diqqəti büdcə icrasının bizə diktə etdiyi fundamental konseptual istiqamətlərə – enerji təhlükəsizliyinə, ekoloji ekosistemimizə və yaşıl gələcəyə keçid strategiyamıza yönəltmək istəyirəm".
Ölkə.az xəbər verir ki, bunu Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov parlamentdə çıxışı zamanı deyib.
O bildirib ki, iqtisadiyyatımızın yeni memarlığı dünya bu gün sürətli və qaçılmaz bir transformasiya dövrünü yaşayır: "Qlobal miqyasda ənənəvi enerji mənbələrinə olan münasibətin dəyişməsi, alternativ enerji sahəsinə qoyulan investisiyaların artması və qlobal neft bazarlarındakı sistematik qiymət dalğalanmaları bizdən tam fərqli bir iqtisadi memarlıq tələb edir. Hesabat ili göstərdi ki, ənənəvi enerji sektorunda qlobal konyunktur səbəbindən daralmalar müşahidə olunsa da, ölkəmizin ümumi iqtisadi artımı tamamilə qeyri neft-qaz sektorunun, yəni real sənayenin, innovasiyaların və xidmət sahələrinin hesabına təmin edilmişdir. Bu, cənab Prezident İlham Əliyevin rəhbərliyi ilə uzun illərdir həyata keçirilən iqtisadiyyatın şaxələndirilməsi və karbonsuzlaşma strategiyasının konseptual qələbəsidir. Bununla belə, biz reallığı düzgün qiymətləndirməliyik. Büdcə gəlirlərimizin strukturunda ənənəvi enerji sektorunun çəkisi hələ də əhəmiyyətlidir.
Bu amil bizə bir strateji öhdəlik qoyur: Biz neft rasionallığından yaşıl enerji rasionallığına keçidi daha da sürətləndirməli və daxili iqtisadiyyatın strukturunda ekoloji innovasiyalara dayanan sahələrin payını artırmalıyıq".
Deputat əlavə edib ki, Azərbaycanın ortamüddətli inkişaf strategiyasında təmiz ətraf mühit və yaşıl artım ölkənin milli prioritetlərindən biri kimi təsbit edilib. "Biz dövlət büdcəsinin icrasına milli prioritetləri maliyyələşdirən strateji alət – "Yaşıl Büdcə" prizmasından yanaşmalıyıq.
"Yaşıl Büdcə" ilə bağlı təəssüf ki, büdcənin icrası ilə əlaqədar təqdim edilmiş sənədlərdə müfəssəl məlumatlara rast gəlinməmişdir.
Bizim yanaşmamız belə olmalıdır:
Təbii resurslardan istifadəyə və ekoloji haqqlara görə büdcəyə daxil olan hər bir manat, birbaşa olaraq həmin resursların bərpasına və ölkədə "Sıfır Tullantı" fəlsəfəsinin qurulmasına xidmət etməlidir.
Ekoloji zərərlərin kompensasiyası üçün nəzərdə tutulan vəsaitlərin xərclənmə strukturu tam şəffaf olmalı, reabilitasiya proqramlarının keyfiyyət səmərəliliyi rəqəmlərlə deyil, birbaşa olaraq təbiətə qaytarılan töhfə ilə ölçülməlidir. Eyni zamanda, nəqliyyat infrastrukturundan toplanan büdcə daxilolmalarının artması ölkəmizdə mobilliyin yüksəldiyini göstərir. Bu artım bizi konseptual olaraq ekoloji təmiz nəqliyyat ekosisteminin yaradılmasına təşviq etməlidir. Büdcə siyasətimiz elektromobillərin, hibrid texnologiyaların və yaşıl infrastrukturun ölkə miqyasında stimullaşdırılmasını bir islahat xətti kimi qəbul etməlidir".
Deputat onu da qeyd edib ki, Qarabağ və Şərqi Zəngəzurun bərpası mərhələsində böyük struktur infrastruktur layihələri öz ilkin mərhələsini tamamladıqca, bizim qarşımızda yeni bir konseptual vəzifə dayanır:
"Bu əraziləri tam mənası ilə "Yaşıl Enerji Zonası"-na çevirmək. Azad edilmiş torpaqlarımızda tətbiq olunan “Ağıllı Şəhər” və “Ağıllı Kənd” layihələri sadəcə texnoloji yenilik deyil, bu, gələcək Azərbaycanın yaşayış və idarəetmə modelinin sınaq meydanıdır. Dövlət əsaslı vəsait qoyuluşlarının səmərəliliyi yoxlanılarkən, bu layihələrin icra sürəti və keyfiyyəti xüsusi nəzarətdə saxlanılmalıdır.
Su idarəçiliyi, tullantıların səmərəli idarə olunması və alternativ enerji şəbəkələrinin inteqrasiyası sahəsində hər hansı bir ləngimə ümumi "Yaşıl Zona" konsepsiyamıza xələl gətirə bilər.
Hökumətin əsaslı vəsait qoyuluşu siyasətində ekoloji komponent hər zaman ən mühüm meyar olaraq qəbul edilməlidir"
Deputat sonda onu da bildirib ki, ölkəmizin təşəbbüskarı olduğu 4 Böyük Yaşıl Enerji Dəhlizi layihəsi bizim gələcək iqtisadi və geopolitik gücümüzün əsas sütunudur: " Büdcə siyasətimiz bu qlobal dəhlizlərin milli seqmentlərinin vaxtında və yüksək texnoloji standartlarla tamamlanmasını təmin edəcək şəkildə çevik olmalıdır. Biz regional yaşıl ticarətin mərkəzi olmaq istəyiriksə, milli maliyyə bazarlarımızda da "Yaşıl istiqrazlar" və dayanıqlı ekoloji investisiya alətlərinin tətbiqini sürətləndirməliyik".
Mürtəza
