Ordumuzun yeni quruculuq mərhələsi: Komando ordusu
“26 İyun – Silahlı Qüvvələr Günü təkcə Azərbaycan hərbçisinin peşə bayramı deyil. Bu tarix həm də xalqımızın qürur, şərəf və qalibiyyət günüdür. Çünki bu gün artıq yalnız ordunun yaranmasını deyil, dünyanın hərb tarixində öz adını qızıl hərflərlə yazan qalib ordunun keçdiyi şərəfli yolu qeyd edirik. Bu gün Azərbaycan Ordusu təkcə dövlətimizin təhlükəsizliyinin təminatçısı deyil, həm də Azərbaycanın beynəlxalq nüfuzunun, siyasi çəkisinin və milli qürurunun əsas dayaqlarından biridir”.
Bunu Ölkə.az-a açıqlamasında sabiq deputat İltizam Yusifov deyib.
O qeyd edib ki, bu gün Azərbaycan dünyada qalib dövlət, Azərbaycan xalqı isə qalib xalq kimi tanınırsa, bunun əsasında ilk növbədə Müzəffər Azərbaycan Ordusunun qəhrəmanlığı, peşəkarlığı və gücü dayanır:
“Müstəqilliyin ilk illərində ölkədə hökm sürən xaos, siyasi böhran və idarəetmədəki pərakəndəlik ordunun formalaşmasına da ciddi maneələr yaradırdı. Lakin xalqın təkidli tələbi ilə hakimiyyətə qayıdan Ulu Öndər Heydər Əliyev ilk gündən dövlət quruculuğunun əsas prioritetlərindən biri kimi məhz müasir, peşəkar və milli ordunun yaradılmasını müəyyənləşdirdi.
1994-cü ildə atəşkəsin əldə olunmasından sonra Silahlı Qüvvələrin formalaşdırılması tamamilə yeni mərhələyə qədəm qoydu. Hərbi hissələr yaradıldı, maddi-texniki baza möhkəmləndirildi, şəxsi heyətin hazırlığı gücləndirildi, peşəkar zabit korpusu formalaşdırıldı. Məhz həmin illərdə əsası qoyulan ordu quruculuğu strategiyası sonrakı tarixi zəfərlərin möhkəm təməlini təşkil etdi.
1998-ci ildə 26 iyun tarixinin Silahlı Qüvvələr Günü elan edilməsi də milli orduya verilən yüksək dövlət dəyərinin ifadəsi idi.
Prezident İlham Əliyevin rəhbərliyi ilə isə ordu quruculuğu keyfiyyətcə tamamilə yeni mərhələyə yüksəldi. Müdafiə xərclərinin dəfələrlə artırılması, müasir silah və texnikaların alınması, hərbi sənaye kompleksinin yaradılması, ən qabaqcıl texnologiyaların tətbiqi Azərbaycan Ordusunu regionun ən güclü silahlı qüvvəsinə çevirdi.
Bu gün Azərbaycan artıq minlərlə adda hərbi təyinatlı məhsul istehsal edən ölkələr sırasındadır. Pilotsuz uçuş aparatları, yüksək dəqiqlikli silah sistemləri, müasir zirehli texnikalar, elektron müharibə vasitələri ordumuzun döyüş imkanlarını daha da artırıb. Müdafiə sənayesinin inkişafı Azərbaycanın hərbi sahədə xarici asılılığını minimuma endirib”.
İ.Yusifov əlavə edib ki, ordunun gücü təkcə silahla ölçülmür: “Əsl güc peşəkar hazırlıq, yüksək döyüş ruhu, intizam və vətən sevgisidir.
2016-cı ilin Aprel döyüşləri və 2018-ci ilin Günnüt əməliyyatı artıq göstərirdi ki, Azərbaycan Ordusu əvvəlki ordu deyil. Bu uğurlar 2020-ci ildə əldə ediləcək tarixi Zəfərin xəbərçisi idi.
2020-ci ilin 27 sentyabrında başlayan 44 günlük Vətən müharibəsi Azərbaycan xalqının şanlı tarixinin zirvəsinə çevrildi. Prezident, Müzəffər Ali Baş Komandan İlham Əliyevin rəhbərliyi altında Azərbaycan Ordusu cəmi 44 gün ərzində otuz ilə yaxın işğal altında qalmış torpaqları azad etdi, BMT Təhlükəsizlik Şurasının uzun illər kağız üzərində qalan qətnamələrini özü icra etdi və tarixi ədaləti bərpa etdi.
Bu Zəfər təkcə hərbi qələbə deyildi. Bu, dövlət iradəsinin, xalq-ordu birliyinin, milli həmrəyliyin və peşəkar ordu modelinin təntənəsi idi.
Azərbaycan Ordusu müharibə zamanı yalnız döyüş meydanında deyil, humanitar hüquqa münasibətdə də bütün dünyaya nümunə göstərdi. Mülki əhalinin qorunması, beynəlxalq humanitar hüququn tələblərinə ciddi riayət olunması ordumuzun yüksək peşəkarlığını və məsuliyyətini nümayiş etdirdi.
2023-cü ilin sentyabrında keçirilən lokal xarakterli antiterror tədbirləri isə Azərbaycan Ordusunun artıq yeni keyfiyyət mərhələsinə yüksəldiyini bütün dünyaya göstərdi. Cəmi 23 saat 43 dəqiqə davam edən əməliyyat nəticəsində dövlətimizin suverenliyi tam bərpa olundu.
Bu əməliyyat müasir hərb tarixində ən dəqiq planlaşdırılmış, yüksək texnologiyalar üzərində qurulmuş və minimum vaxt ərzində maksimum nəticə əldə edilən uğurlu hərbi əməliyyatlardan biri kimi qiymətləndirilir.
Lakin əldə olunan Zəfər Azərbaycan Ordusunun inkişafında son nöqtə olmadı. Əksinə, qalibiyyət yeni və daha iddialı inkişaf mərhələsinin başlanğıcına çevrildi.
Bu gün Prezident İlham Əliyevin rəhbərliyi ilə Azərbaycan Ordusunda postmüharibə dövrünün yeni ordu modeli formalaşdırılır. Komando hərbi hissələrinin yaradılması, xüsusi təyinatlı qüvvələrin genişləndirilməsi, Milli Müdafiə Universitetinin fəaliyyətə başlaması, müasir hərbi idarəetmə sistemlərinin tətbiqi, pilotsuz döyüş vasitələrinin və rəqəmsal texnologiyaların daha geniş istifadəsi bu yeni mərhələnin əsas istiqamətləridir.
Artıq Azərbaycan Ordusu klassik ordu modelindən yüksək mobilliyə malik, sürətli qərar qəbul edən, çevik, peşəkar komando ordusuna transformasiya olunur. Bu isə müasir müharibələrin əsas tələblərinə tam cavab verən yanaşmadır.
Türkiyə ilə strateji müttəfiqlik, "Bir millət, iki dövlət" prinsipi əsasında həyata keçirilən hərbi əməkdaşlıq, mütəmadi birgə təlimlər, müdafiə sənayesi sahəsində inteqrasiya, həmçinin Pakistan, İsrail və digər tərəfdaş ölkələrlə inkişaf edən hərbi-texniki əməkdaşlıq ordumuzun döyüş imkanlarını daha da artırır.
Bu gün Azərbaycan Ordusu dünyanın nüfuzlu hərbi reytinqlərində ilk 60 güclü ordu sırasında yer alır. Lakin Azərbaycanın əsl üstünlüyü təkcə statistik göstəricilərlə ölçülmür. Ordumuz döyüş meydanında qalib gəlib, öz gücünü praktikada sübut edib və müasir müharibənin necə aparıldığını bütün dünyaya nümayiş etdirib.
Artıq Azərbaycan Ordusu regionun təhlükəsizlik arxitekturasını müəyyən edən əsas hərbi gücə çevrilib. Güclü ordu Azərbaycanın diplomatik mövqelərini daha da möhkəmləndirib, milli maraqlarımızın qorunmasına əlavə təminat yaradıb.
Bu gün Azərbaycan vətəndaşı qürurla deyə bilər ki, onun ordusu qalib ordudur. Bu gün Azərbaycan əsgəri yalnız Vətənin sərhədlərini deyil, xalqın qürurunu, dövlətin müstəqilliyini və gələcəyini qoruyur.
26 İyun – Silahlı Qüvvələr Günü artıq yalnız yaranışın deyil, həm də tarixi Zəfərin, bərpa olunmuş suverenliyin, milli qürurun və yeni yüksəliş mərhələsinin rəmzidir.
Azərbaycan Ordusu bundan sonra da dövlətimizin qüdrətinin əsas dayağı, xalqımızın qürur mənbəyi və regionun sarsılmaz təhlükəsizlik təminatçısı olaraq yeni uğurlara imza atacaq. Çünki güclü dövlətin ən möhkəm sipəri güclü ordudur. Azərbaycan isə bu gün məhz güclü ordusuna söykənən qalib dövlətdir”.
Mürtəza
