Brüsseli Bakı ilə hesablaşmağa vadar edən SƏBƏBLƏR
Bunu Ölkə.az-a açıqlamasında sabiq deputat İltizam Yusifov deyib.
Qlobal silkələnmə Brüsseli yeni marşrut axtarışına çıxardı
İ. Yusifov bildirib ki, Rusiya-Ukrayna müharibəsi Avropanın təhlükəsizlik arxitekturasını sarsıtdı, enerji və logistika xəritəsini dağıtdı, ənənəvi ticarət və nəqliyyat kanallarını risk zonasına çevirdi: “Ardınca Körfəz bölgəsindəki gərginliklər və Yaxın Şərqdə dərinləşən qarşıdurmalar qlobal tədarük zəncirlərinə, dəniz marşrutlarına, enerji bazarına və Avropanın Şərqlə iqtisadi əlaqələrinə yeni zərbə vurdu. Artıq Brüsseldə heç kim əvvəlki dünyanın geri qayıdacağına inanmır. Yeni geosiyasi reallıq Avropanı alternativ marşrutlar, alternativ enerji mənbələri və alternativ strateji tərəfdaşlar axtarmağa məcbur edir.
Məhz bu məqamda Azərbaycan faktoru bütün ağırlığı ilə önə çıxır. Çünki Prezident İlham Əliyevin illərdir qlobal çaöırışlara uyğun məqsədyönlü şəkildə həyata keçirdiyi çevik siyasət, enerji marşrutlarının şaxələndirilməsi, nəqliyyat-kommunikasiya xətlərinin qurulması, Şərq-Qərb və Şimal-Cənub bağlantılarının inkişafı, Xəzər üzərindən Orta Dəhlizin gücləndirilməsi, liman, dəmir yolu, logistika və rəqəmsal infrastrukturun genişləndirilməsi nəticədə bu gün qlobal böhranların fonunda Avropa üçün sadəcə faydalı deyil, strateji əhəmiyyətli çıxış yoluna çevrilib.
Prezident İlham Əliyev dəfələrlə vurğulayıb ki, Azərbaycan yalnız enerji ixrac edən ölkə deyil, həm də Avrasiya məkanında etibarlı tranzit, bağlantı və əməkdaşlıq mərkəzidir. Son illər Bakının yaratdığı nəqliyyat, enerji və logistika infrastrukturu göstərdi ki, Cənubi Qafqaz artıq periferik məkan deyil, qlobal ticarət yollarının, enerji təhlükəsizliyinin və Avropa-Asiya bağlantılarının əsas düyün nöqtələrindən birinə çevrilir. Brüssel də məhz buna görə Azərbaycanı “alternativlərdən biri” kimi deyil, ən sərfəli, ən real və ən işlək geostrateji platforma kimi görməyə başlayıb”.
O əlavə edib ki, bu gün Brüsseli Bakı ilə hesablaşmağa vadar edən səbəblər aydındır: “Birincisi, Rusiya-Ukrayna müharibəsi və Körfəz böhranı Avropanı yeni logistika, enerji və ticarət marşrutları axtarmağa məcbur edib və bu axtarışın ən real cavabı Azərbaycandır. İkincisi, Bakı regionda dayanıqlı sülhün, təhlükəsizliyin və inteqrasiyanın əsas aktoruna çevrilib. Üçüncüsü, Ermənistanın belə sabit və müstəqil gələcəyi Azərbaycanla normallaşmadan keçir. Dördüncüsü, Azərbaycan Avropanın enerji təhlükəsizliyində yalnız bugünün qaz tərəfdaşı yox, sabahın yaşıl enerji dayağına çevrilir. Beşincisi, Bakı Avropanı Türk dünyası, Xəzər hövzəsi və Mərkəzi Asiya ilə birləşdirən strateji qapıdır.
Bütün bunların fonunda Ursula fon der Lyayenin Cənubi Qafqaz səfərinin əsas siyasi mesajı budur: Avropa artıq Cənubi Qafqazda kimin gündəm qurduğunu, kimin marşrut çəkdiyini, kimin enerji və bağlantı xəritəsini formalaşdırdığını anlayır. Bu anlayış Brüsseli Bakı ilə yaxınlaşmağa, əməkdaşlığı dərinləşdirməyə və Azərbaycanın yaratdığı reallıqla hesablaşmağa məcbur edir. Çünki yeni dövrdə Avropa üçün Azərbaycan sadəcə tərəfdaş deyil, Şərqlə Qərb arasında strateji bağlantının, regional sülhün və geoiqtisadi təhlükəsizliyin əsas dayağıdır”.
Mürtəza
