Deputat: “Elə edək ki, qanun kağız üzərində qalmasın”

Ölkə.az xəbər verir ki, bunu deputat Müşfiq Cəfərov iyulun 7-də parlamentdə “Kraudfandinq haqqında” qanun layihəsinin müzakirəsi zamanı deyib. 

Onun sözlərinə görə, Azərbaycan reallığında vətəndaşımızın yeni maliyyə alətlərinə qarşı təbii və haqlı bir ehtiyatı var:

“İnsanlarımız acı təcrübələrdən, müxtəlif maliyyə piramidalarından, internet üzərindən qurulan saxta layihələrdən ehtiyat edirlər. Buna görə də, bu qanunun işlək olması üçün biz “Bu layihə innovativdir” şüarından keçib, vətəndaşa “Sizin pulunuz necə qorunur?” sualının konkret cavabını verməliyik”.

Deputat əlavə edib ki, dünyada kraudfandinqi populyar edən onun rəqəmsallığı deyil, dövlətlərin qurduğu sarsılmaz təhlükəsizlik divarlarıdır:

“Lakin gəlin görək bu qanun Azərbaycanda necə işləyəcək və ya işlək edə biləcəyik? Bizim qanun layihəsində də məhz bu etibar mexanizmlərinin fundamenti qoyulub. Bu sistemin Azərbaycanda real işləməsi üçün 3 əsas sütunumuz var:

Birincisi, Ciddi Dövlət Filtri: Hər yoldan ötən kraudfandinq platforması aça bilməyəcək. Mərkəzi Bank bu operatorları ciddi reyestr nəzarətində saxlayacaq, onların təsisçilərinin və benefisiar mülkiyyətçilərinin qüsursuz işgüzar nüfuzunu yoxlayacaq.

İkincisi, dondurulmuş hesablar Sistemi: Vətəndaşın layihəyə yatırdığı pul birbaşa sahibkarın cibinə getmir. Pul bankda xüsusi hesabda toplanır. Əgər layihə hədəflənən məbləği toplaya bilməsə və ya sahibkar vədini yerinə yetirməsə, Mərkəzi Bankın qaydalarına əsasən, o vəsait avtomatik olaraq vətəndaşın hesabına geri qayıdır. Yəni, "pulu topladım və qaçdım" ssenarisi texniki olaraq qeyri-mümkündür.

Üçüncüsü, emosional qorunma: Vətəndaşımız layihənin təsirinə düşüb emosional qərar verərsə, qanunun ona verdiyi 7 günlük müddətdə heç bir cərimə ödəmədən fikrindən daşına bilər.

Milli Məclis olaraq bizim hədəfimiz sadəcə bir qanun qəbul etmək deyil, Azərbaycanda rəqəmsal investor mədəniyyəti formalaşdırmaqdır. Vətəndaşımız əmin olmalıdır ki, onun yastıq altında saxladığı və ya bankda duran kiçik sərbəst vəsaiti, dövlətin tam hüquqi zəmanəti altında ölkəmizin real sektoruna, kənd təsərrüfatına, gənclərin startaplarına yatırıla bilər və bu, həm ona, həm də dövlətimizə qazandıracaq. Bu qanun layihəsi ölkədə şəffaf, risklərdən sığortalanmış və tam tənzimlənən yeni bir maliyyə ekosisteminin əsasını qoyur”.

Mürtəza