Razi Nurullayev: “Qolumuzu çırmalayıb işlərə başlayaq”

Ölkə.az xəbər verir ki, bunu deputat Razi Nurullayev iyulun 7-də parlamentdə “Kraudfandinq haqqında” qanun layihəsinin müzakirəsi zamanı deyib. 
Onun sözlərinə görə, yaxşı ideyası olan gənclər və startaplar bankdan kredit almaq istəyəndə ağır girov tələbləri və yüksək faizlərlə üzləşirlər: 

“Bu qanun isə onlara rəqəmsal platformalar vasitəsilə birbaşa insanlardan və investorlardan vəsait toplamaq, öz ideyalarını həyata keçirmək üçün alternativ maliyyə imkanı yaradır”. 

Deputat əlavə edib ki, bu qanunun qəbulu ilə kapital bazarlarına çıxış daha əlçatan olacaq: 
“Ümid edirəm ki, bu sahəyə həqiqətən də sərbəstlik veriləcək, əlavə maneələr yaradılmayacaq və sağlam rəqabət təmin olunacaq. Belə olan halda, artıq təkcə böyük şirkətlər və imkanlı investorlar deyil, cibində cəmi 100 manatı olan vətəndaş da perspektivli bir startapa yatırım edə, onun inkişafında pay sahibi ola biləcək. Bu, həm insanların yığımlarının iqtisadiyyata cəlb olunmasına, həm də yeni ideyaların daha sürətlə reallaşmasına ciddi töhfə verəcək.
Bunun üçün elə bu gündən hamımız qolumuzu çırmalayıb maarifləndirmə işlərinə başlamalıyıq”. 

R.Nurullayev qanun layihəsi ilə bağlı narahatlığını dilə gətirərək deyib ki, bu qanun həddindən artıq bürokratik tətbiq olunsa, məqsədinə çatmayacaq: “Ona görə də təklif edirəm ki, qanunun icrasında üç əsas prinsip rəhbər tutulsun: sadə qeydiyyat, şəffaf nəzarət və investorların maarifləndirilməsi. İnsan bilməlidir ki, kraudfandinq bank əmanəti deyil, burada risk də var, yüksək gəlir əldə etmək imkanı da..”.
Mürtəza